नाशिक- उपनगर येथील रामदास स्वामीनगरात ट्रकखाली चिरडून ऋषिका आनंद चांदवले (वय २३) या तरुणीचा मृत्यू, वडील आनंद चांदवले गंभीर जखमी झाले. ट्रकचालक महेंद्र वाळुंज याला पोलिसांनी ताब्यात घेतले आहे.

ऋषिका सायंकाळी सातला वडिलांसोबत कणकवली (जि. सिंधुदुर्ग) येथील नर्सिंग कॉलेजला जाण्यासाठी घरातून निघाली होती. त्याचदरम्यान सुरतहून चाकण (पुणे)कडे जाणारा ट्रक (एमएच १४, एचयू ८४०७) टाकळीमार्गे नाशिक रोडच्या दिशेने रामदास स्वामीनगर चौकात येत होता. याच वेळी ट्रकने दोघांना धडक दिल्यामुळे तरुणीचा जागीच मृत्यू झाला.

तिच्या वडिलांना जयराम हॉस्पिटलमध्ये उपचारासाठी दाखल करण्यात आले. ऋषिका कणकवली येथे नर्सिंगचे शिक्षण घेत होती. दोन दिवसांसाठी सुटीमध्ये ती घरी आली होती. तिच्या मृत्यूने परिसरात हळहळ व्यक्त होत आहे. पुन्हा एकदा टाकळी मार्गावरील अवजड वाहनांची वाहतूक बंद करण्यात यावी. यापूर्वीही या परिसरामध्ये अवजड वाहनांमुळे अनेक अपघात झालेले आहेत, अशी माहिती नागरिकांनी दिली.