Satpur Police Station : त्र्यंबक रोडवरील सातपूर पोलिस ठाण्याच्या मुख्य इमारतीच्या पाठीमागेच सुमारे चार कोटी रुपये खर्चून नवीन इमारती बांधून उभी राहिली आहे.

परंतु अजूनही पोलिस ठाणे या इमारतीमध्ये स्थलांतरित झालेले नसून, नवीन वर्षात तरी पोलिस ठाणे नवीन इमारतीत जाते की आणखी प्रतिक्षा करावी लागते याकडे सातपूरकरांचे लक्ष लागून आहे. त्याचप्रमाणे, उपनगर, म्हसरुळ आणि पंचवटी पोलिस ठाण्याच्या इमारतींबाबतचे प्रश्न प्रलंबित आहेत.

नाशिक शहर पोलिस आयुक्तालय हद्दीत १३ पोलिस ठाणे आहेत. यातील सातपूर पोलिस ठाणे एक महत्त्वाचे पोलिस ठाणे मानले जाते. (Satpur police station not shifted to new building nashik news)

औद्योगिक वसाहतीसह कामगार वसाहत आणि नववसाहतींमुळे सातपूर पोलिस ठाण्याची हद्दही वाढली आहे. त्यामुळे पोलिस यंत्रणेवरही कामाचा भार वाढला आहे. त्र्यंबक रोडवरील सकाळ सर्कल येथे सातपूर पोलिस ठाणे आहे.

सद्यःस्थितीत सातपूर पोलिस ठाण्याची जागा कामकाजाच्या दृष्टिकोनातून अपुरी पडते. तक्रार करण्यासाठी येणाऱ्या तक्रारदारांना बसण्यासाठी जागा नाही. पावसाळ्यातही इमारतीचे छत गळते. अशा एक ना अनेक समस्या या जीर्ण झालेल्या इमारतीचे आहेत.

त्यामुळे आमदार सीमा हिरे यांच्या माध्यमातून सातपूर पोलिस ठाण्याच्या नवीन इमारतीसाठी सुमारे चार कोटींचा निधी २०२० मध्ये मंजूर झाला. त्यानंतर प्रत्यक्ष कामकाजालाही प्रारंभ झाला. दरम्यानच्या काळात कोरोनामुळे कामाला विलंब झाला.

परंतु आजमितीस पोलिस ठाण्याची नवीन इमारत पूर्णपणे बांधून व रंगरंगोटी करून तयार आहे. परंतु तरीही पोलिस ठाण्याचे स्थलांतर झालेले नाही. त्यामुळे सर्व सोयीसुविधांनी युक्त नवीन इमारत अक्षरश धूळखात पडून आहे.

सुसज्ज नवीन इमारत

सातपूर पोलिस ठाण्यासाठीची नवीन सुसज्ज इमारतीमध्ये आधुनिक दर्जाच्या सोयीसुविधा करण्यात आलेल्या आहेत. वरिष्ठ पोलिस निरीक्षकांसह अधिकारी वर्गांसाठी स्वतंत्र दालन, ठाणे अंमलदार व तक्रारदारांसाठीचे स्वतंत्र दालन आहे. त्याचप्रमाणे, इमारत दुमजली असल्याने पोलिसांच्या कामकाजाच्या दृष्टिकोनातून विभागवार सोयी उपलब्ध करून देण्यात आलेल्या आहेत.

पंचवटी, उपनगर, म्हसरुळ ठाणेही प्रस्तावित

आगामी सिंहस्थ कुंभमेळ्याच्या पार्श्वभूमीवर पंचवटी पोलिस ठाण्याचीही नूतन इमारत प्रस्तावित आहे. सद्यःस्थितीत पंचवटी पोलिस ठाणेच्याच जागेवर नवीन प्रस्तावित इमारतीचा आराखडा तयार आहे. सिंहस्थ कुंभमेळा अवघ्या तीन वर्षांवर येऊन ठेपल्याने नवीन इमारतीसाठी निधीला अद्याप मंजुरी नाही.

तर, उपनगर पोलिस ठाण्यासाठीही जागा निश्चित झाली आहे परंतु त्याबाबतचा प्रस्तावही शासनदरबारी प्रलंबित आहे. याचप्रमाणे, म्हसरुळ पोलिस ठाणे सध्या मेरीच्या जागेत सुरू असून तीच जागा पोलिस ठाण्यासाठी निश्‍चित करून त्यासंदर्भातील प्रस्ताव शासनाकडे प्रलंबित आहे.

"सातपूर पोलिस ठाण्याच्या नवीन इमारतीचे काम पूर्ण झालेले आहे. काही दिवसात त्यासंदर्भातील प्रक्रिया पूर्ण करून पोलिस ठाणे नवीन इमारतीमध्ये स्थलांतरित केले जाणार आहे. अन्य पोलिस ठाण्यांच्या प्रस्तावांसाठीचाही पाठपुरावा सुरू आहे. तेही लवकरच मार्गी लागतील." - चंद्रकांत खांडवी, पोलिस उपायुक्त, मुख्यालय, नाशिक.