खामखेडा (जि. नाशिक) : शैक्षणिक वर्ष २०२१- २०२२ ची उन्हाळी सुटी २ मे पासून, तसेच नव्या शैक्षणिक वर्षातील शाळा १३ जूनपासून सुरू केल्या जाव्यात, असा शासन निर्णय शिक्षण विभागाकडून (Department of Education) जारी करण्यात आला आहे. तसेच, जून महिन्यातील विदर्भातील तापमान विचारात घेता उन्हाळ्याच्या सुटीनंतर तेथील शाळा या २७ जूनपासून सुरू करता येणार आहेत.

शिक्षण विभागाच्या निर्णयानुसार राज्यातील शाळांच्या सुटीचा कालावधी २ मेपासून ग्राह्य धरण्यात येणार आहे. शैक्षणिक वर्ष २०२२- २०२३ मध्ये शाळा जूनच्या दुसऱ्या सोमवारपासून, तर विदर्भामध्ये जूनच्या चौथ्या सोमवारपासून सुरू होतील, असे निर्णयात म्हटले आहे. उन्हाळ्याची व दिवाळीची दीर्घ सुटी कमी करून त्याऐवजी गणेशोत्सव किंवा नाताळसारख्या सणांच्या सुट्यांचे नियोजन शिक्षणाधिकाऱ्यांच्या परवानगीने करावे.

मात्र, माध्यमिक शाळा संहिता नियमानुसार शैक्षणिक वर्षातील सर्व प्रकारच्या एकूण सुट्या ७६ दिवसांपेक्षा जास्त होणार नाहीत, याची दक्षता घेण्यात यावी, असेही शिक्षण विभागाच्या शासन निर्णयात स्पष्ट केले आहे. संपूर्ण राज्यातील शाळांच्या उन्हाळी सुटी आणि शैक्षणिक वर्ष सुरु करण्याच्या कालावधीमध्ये एकवाक्यता व सुसंगती आणण्यासाठी शिक्षण विभागाने हा निर्णय जाहीर केल्याचे पुण्याचे उपसंचालक विकास गरड यांनी सांगितले.