Nashik Lok Sabha Election : लोकसभा निवडणुकीत उमेदवारांच्या खर्चावर नियंत्रण ठेवण्यासाठी प्रत्येक उमेदवाराला खास निवडणुकीसाठी बँकेत स्वतंत्र खाते उघडावे लागणार आहे.

भारत निवडणूक आयोगामार्फत लोकसभा सार्वत्रिक निवडणूक- २०२४ चा कार्यक्रम लवकरच जाहीर होणार असून या निवडणुकीसाठी इच्छुक उमेदवार नामनिर्देशन पत्र दाखल करणार आहेत. (separate bank account for aspirants Lok Sabha Election Preparations nashik news)

आगामी लोकसभा निवडणुकांच्या अनुषंगाने संभाव्य उमेदवारांनी निवडणूक खर्चासाठी उमेदवारी अर्ज भरण्यापूर्वी किमान एक दिवस अगोदर स्वतंत्र बँक खाते उघडावे, असे जिल्हा निवडणूक अधिकारी यांनी कळविले आहे. निवडणुकीत मोठ्या प्रमाणात विविध राजकीय पक्षांचा वेगवेगळ्या कारणांवर खर्च होत असला तरी त्याची अनेकदा नोंद होत नाही.

या संदर्भात निवडणूक आयोगाने दिलेल्या निर्देशानुसार आता प्रत्येक राजकीय पक्षाच्या आणि अपक्ष उमेदवारांना निवडणुकीच्या खर्चाच्या दृष्टीने कुठल्याही राष्ट्रीयीकृत बँक आदी ठिकाणी स्वतंत्र खाते उघडणे आवश्यक आहे. ज्या दिवशी उमेदवार नामांकन अर्ज भरेल त्याच्यापूर्वी त्यांनी खाते उघडणे आवश्यक आहे.

त्या खात्याचा क्रमांक आणि बँकेचा नामांकन पत्रामध्ये उल्लेख करावा लागेल. या खात्याच्या माध्यमातून उमेदवाराला खर्च करावा लागणार आहे. दर आठ दिवसांनी निवडणूक अधिकाऱ्‍यांच्या आदेशानुसार संबंधित उमेदवारांचा खर्चाचा तपशील बँकेकडून घेण्यात येईल आणि नोंद त्यांच्याकडे राहील.