नाशिक : स्मार्टसिटीअंतर्गत (Smart City) शहरातील गावठाण भागात मोठ्या प्रमाणात रस्त्यांची कामे (Road Construction) सुरू आहे. मात्र, गेल्या पंधरा दिवसापासून कामे बंद असून, ठेकेदार काम करत नसल्याचे उत्तर स्मार्टसिटी कंपनीकडून मिळत असल्याने या विरोधात शिवसेना (Shivsena) आक्रमक झाली आहे.

स्मार्टसिटी कंपनीच्या कार्यालयाला टाळे ठोकण्याचा इशारा महापालिकेचे माजी विरोधी पक्षनेते अजय बोरस्ते यांनी दिला. (Shivsena aggressive over incomplete road work in villages smart city company will close nashik Latest Marathi News)

स्मार्टसिटीअंतर्गत गावठाण भागात काँक्रिटीकरण, रस्ते, ड्रेनेजलाइन तसेच पाइपलाइन टाकण्याचे काम सुरू आहे. त्यासाठी रस्त्या मोठ्या प्रमाणात खोदण्यात आले आहे. गोळे कॉलनी, घारपुरे घाट येथे काँक्रिट करणाची मागणी नसताना स्मार्टसिटी कंपनीने काम सुरू केले.

मात्र, अद्यापपर्यंत या रस्त्यांची कामे झालेली नाही. यासंदर्भात स्मार्टसिटी कंपनीकडे विचारणा केल्यानंतर ठेकेदार काम करत नसल्याचे कारण दिले आहे. ठेकेदार का काम करत नाही, याचा खुलासा करण्याची मागणी निवेदनात करण्यात आली आहे.

पावसाळ्यात अगोदरच रस्त्यांवर मोठ्या प्रमाणात पाणी साचल्याने नागरिकांना मोठ्या प्रमाणात मनस्ताप सहन करावा लागत आहे. वाहतूक, पार्किंगचा त्रास सहन करावा लागत आहे. पाण्यातून वाट काढत पुढे जावे लागते.

अशा परिस्थितीत रस्त्यावर खोदून ठेवलेल्या खड्ड्यांमुळे साचलेल्या पाण्यामुळे अपघात होऊ शकतात. या सर्व प्रकाराला स्मार्टसिटी कंपनी जबाबदार आहे. त्यामुळे तातडीने कामे पूर्ण करावी अन्यथा शिवसेना स्मार्टसिटीच्या कारभाराविरोधात जनआंदोलन उभारेल.

स्मार्टसिटी कंपनीने सुरू केलेली कामे वेळेत पूर्ण न झाल्यास कार्यालयाला टाळे लावल्याशिवाय राहणार नाही. त्याची सर्वस्वी जबाबदारी कंपनीच्या अधिकाऱ्यांवर राहील, असे निवेदनात म्हटले आहे.

"ठेकेदार काम करत नाही, हे स्मार्टसिटी कंपनीकडून मिळालेले उत्तर चुकीचे आहे. का काम करत नाही, याचा खुलासा व्हावा अन्यथा जनआंदोलन उभारू."

- अजय बोरस्ते, माजी विरोधी पक्षनेता, महापालिका.