नाशिक : महाराष्ट्र लोकसेवा आयोगाची रविवारी मुख्य परीक्षा होती. जिल्हा न्यायालयासमोरील बिटको हायस्कुल हे परीक्षा केंद्र होते.

याठिकाणी असलेल्या शिवतिर्थावर मराठा समाजाला आरक्षण मिळाल्याने जल्लोषकर्त्यांनी डीजे लावून घोषणाबाजी सुरू केली. (Shouting slogans due to maratha reservation in mpsc examination centre in defiance of police nashik news)

त्यावेळी पोलिसांनी त्यांना परीक्षा सुरू असल्याचे सांगूनही त्याठिकाणी असलेल्या वक्ता व त्याचे पदाधिकारी पोलिसांनाही जुमानत नसल्याचे दिसून आले. महाराष्ट्र लोकसेवा आयोगाची (एमपीएससी) रविवारी मुख्य परीक्षा होती. सकाळी ९ ते १२ आणि दिव्यांगांसाठीचा ९ ते १ वाजेपर्यंत आणि दुपारी ३ ते ५ अशी परीक्षेची वेळी होती.

स्मार्ट रोडवरील जिल्हा न्यायालयासमोर असलेल्या बिटको हायस्कुलमध्ये एमपीएससी परीक्षार्थींची परीक्षा होती. शेकडो परीक्षार्थी या केंद्रावर पेपर लिहित होते. दरम्यान, मराठा समाजाला आरक्षण मिळाल्याने शहरातच नव्हे तर राज्यात जल्लोष करण्यात आला. या पार्श्वभूमीवर सकल मराठी समाजातर्फे रविवारी (ता. २८) सकाळी ११ वाजत जिल्हा न्यायालयासमोर असलेल्या शिवतीर्थांवर आनंदोत्सवाचे आयोजन करण्यात आले होते.

जल्लोषकर्त्यांनी यावेळी एका वाहनातून डीजेही आणला होता. त्यांनी तो सुरू करताच परीक्षेसाठी तैनात असलेल्या पोलिसांनी धाव घेत तो बंद केला आणि एमपीएससीची परीक्षा आहे. पेपर संपल्यानंतर त्यांना काही वेळात जल्लोष आटोपून जाण्यास सांगितले. परंतु, १२ च्या सुमारास स्वयंघोषित नेता आला आणि त्याने माईकचा ताबा घेत भाषणबाजी तर केलीच, त्यानंतर घोषणाबाजी करीत डीजेच्या तालावर जमलेल्यांनी तालही धरला.

परंतु त्यावेळी परीक्षा केंद्रामध्ये दिव्यांग परीक्षार्थी पेपर लिहित होते. पोलिसांनी संबंधितांना आवाज कमी करण्याचा आणि कमी आवाजात घोषणाबाजी करण्याच्या सूचना करूनही कोणीही पोलिसांना जुमानत नसल्याचेच दिसून आले. यामुळे काही परीक्षार्थींनी नाराजीही व्यक्त केली.