NMC News : केंद्र शासनाच्या राष्ट्रीय स्वच्छ हवा कार्यक्रम (नॅशनल क्लीन एअर प्रोग्रॅम) जाहीर केला आहे. त्याअंतर्गत नाशिक शहरातील ११३ सार्वजनिक शौचालयांवर सौरऊर्जा पॅनल लावले जाणार आहे.

यातून एक ते तीन किलोवॅट क्षमतेचे सोलर पॅनल बसविण्यासाठी महासभेने एक कोटी ८२ लाख रुपयांच्या प्रस्तावाला मंजुरी दिल्याची माहिती विद्युत विभागाचे अध्यक्ष अभियंता उदय धर्माधिकारी यांनी दिली. (Solar panels on 113 toilets in city 1 Crore 82 Lakh proposal approved NMC News)

प्रदूषण कमी करण्यासाठी केंद्र सरकारने नॅशनल क्लीन एअर प्रोग्रॅम (एन-कॅप) जाहीर केला आहे. त्यात हवा प्रदूषण रोखणे व त्या माध्यमातून २०२४ पर्यंत देशभरातील १३२ शहरांमधील प्रदूषण पातळी ३० टक्क्यांपर्यंत कमी करण्याचे नियोजन आहे.

विकसनशील नाशिकमध्येदेखील प्रदूषणाची पातळी घसरत असल्याच्या पार्श्वभूमीवर केंद्र सरकारच्या पर्यावरण विभागाने नाशिक शहराचादेखील योजनेत समावेश केला आहे. वायुप्रदूषण रोखण्यासाठी केंद्र सरकारने नाशिक महापालिकेला चाळीस कोटी रुपयांचे अनुदान दिले आहे.

या अनुदानातून शहरातील ११३ सार्वजनिक शौचालयांवर सौरऊर्जा पॅनल बसविले जाणार आहेत. त्यासाठी घनकचरा व्यवस्थापन विभागाने विद्युत विभागाला प्रस्ताव सादर केला होता. त्यानुसार एक कोटी ८२ लाख रुपये खर्चाच्या प्रस्तावाला महासभेने मंजूर दिली.

हेही वाचा : संतुलित आहारातून रोखा फॅटी लिव्हरचा आजार

या संदर्भातील निविदा प्रक्रियादेखील जाहीर करण्यात आली असून लवकरच पॅनल बसविण्याचे काम सुरू होणार असल्याची माहिती धर्माधिकारी यांनी दिली.

"घनकचरा व्यवस्थापन विभागाने विद्युत विभागाकडे प्रस्ताव देऊन ११३ सार्वजनिक शौचालयांवर सौरऊर्जा पॅनल बसवण्याची मागणी केली. त्याअनुषंगाने लवकरच सौरऊर्जा पॅनल बसविले जाणार असून, या माध्यमातून हवेचे प्रदूषण कमी होण्याबरोबरच वीजदेखील बचत होईल." - उदय धर्माधिकारी, अधीक्षक अभियंता, विद्युत विभाग, महापालिका.