वाडीवऱ्हे (जि. नाशिक) : दुगारवाडी (ता. त्र्यंबकेश्वर) येथील पिण्याच्या पाण्याच्या विहीर खोल करून नळ पाणीपुरवठा योजना सुरू करावी, या मागणीची पूर्तता केली नाही, तर बुधवारी (ता. १३) पंचायत समितीवर (Panchayat Samiti) हंडा मोर्चा काढण्यात येणार असल्याचा इशारा श्रमजीवी संघटनेचे तालुकाध्यक्ष भगवान डोखे, सचिव तानाजी शिंदे यानी दिला आहे.

त्र्यंबकेश्वर तालुक्यात भीषण पाणीटंचाई निर्माण झाली असून, पंचायत समितीकडे मागणी केलेल्या टँकरचे प्रस्ताव मंजूर करावेत, हातपंप बसवावेत, कळमुस्ते ग्रामपंचायतपैकी दुगारवाडी येथे तत्काळ पाणीपुरवठा सुरू करावा, या मागण्यांचे निवेदन दिले होते. दुगारवाडी येथे पाणीपुरवठा सुरू करण्यासाठी मागील महिन्यात पाणीपुरवठा विभागाचे अधिकारी त्या ठिकाणी जाऊन पाहणीसाठी गेले होते. अहवाल तयार करून अंदाजपत्रक तयार केले होते. मात्र अद्यापपर्यंत त्या वाडीला पिण्याच्या पाण्याची व्यवस्था केलेली नाही.

दुगारवाडीतील महिलांना ३ किलोमीटर अंतरावरील नदीपात्रांच्या मोठ्या खड्यात उतरून पाणी आणावे लागत आहे. अशी भयानक पाणीटंचाई असताना, पंचायत समितीकडून काहीही व्यवस्था केली जात नाही. दुगारवाडी, बाफनविहीर, शिवाची वाडी, खरवळ, भोकरवाडी व इतर पाड्यावर मोठ्या प्रमाणात पाणीटंचाई निर्माण झाली आहे. या गावांमध्ये टँकर सुरू करावे, या मागणीसाठी आम्ही श्रमजीवी संघटनेतर्फे त्र्यंबकेश्वर पंचायत समिती कार्यालयावर हंडा मोर्चा काढण्यात येईल. जोपर्यंत संबंधित गावात टँकरने पाणी पोच होत नाही, तोपर्यंत आमचे आंदोलन सुरूच राहील, असा इशारा श्रमजीवी संघटनेने दिला आहे