सिन्नर : सिन्नर तालुका पंचायत समितीचे पहिले सभापती, जिल्हा परिषद सदस्य, लोक शिक्षण मंडळाचे संस्थापक , डोंगरे वस्तीगृह व क्रांतिवीर वसंतराव नाईक शिक्षण संस्थेचे सदस्य, शिक्षण, समाजकारण, राजकारण, सहकार क्षेत्रातील स्वातंत्र्योत्तर काळातील दुसऱ्या पिढीचे प्रतिनिधी सुदाम (दाजी) भागुजी सांगळे वकील यांचे वयाच्या ९८ व्या वर्षी दुःखद निधन झाले. मराठा विद्या प्रसारक समाजाच्या डॉ वसंतराव पवार वैद्यकीय महाविद्यालयात शनिवारी रात्री १०.३८ वा वाजता त्यांनी अखेरचा श्वास घेतला.

कार्य सांगळे सरांचे

सिन्नर पंचायत समितीचे पहिले सभापती, नाशिक जिल्हा परिषदेचे माजी सदस्य, व्ही एन नाईक एज्युकेशन सोसायटीचे संस्थापक अध्यक्ष, लोकशिक्षण मंडळ सिन्नर संस्थेचे संस्थापक, सिन्नर बार असोसिएशनचे माजी अध्यक्ष ,असे विविध पदे भूषविलेले सिन्नर तालुक्याचे भूषण आदरणीय तपस्वी अँड. सुदामराव भागूजी सांगळे अर्थात दाजी यांचे वयाच्या 98 व्या वर्षी अल्पशा आजाराने शनिवारी दुःखद निधन झाले.

1960 च्या कालखंडात सिन्नर या ठिकाणी वकिली व्यवसाय सुरू करून सिन्नर तालुक्यात संपूर्ण दौरा करून लोकांच्या समस्या समजावून घेऊन त्या कामी प्रामुख्याने राज्यातील मुख्यमंत्र्यांना विनंती करून सिन्नरला भोजापूर धरणाची मुहूर्तमेढ रोवली.

महाराष्ट्राचे तत्कालीन मुख्यमंत्री वसंतराव नाईक यांच्या विचाराने प्रभावित होऊन महाराष्ट्रातील पहिला वसंत बंधारा दोडी या ठिकाणी बांधला. त्यांच्या ऋणातून मुक्त होण्यासाठी लोकशिक्षण मंडळ सिन्नर संस्थेचे नांदूर शिंगोटे येथील शाळेला व्ही पी नाईक हायस्कूल असे नाव दिले.

शैक्षणिक संस्था स्थापन करून शेकडो युवकांना रोजगाराची नोकरीची संधी उपलब्ध करून दिली. ज्याला खरंच नोकरीची गरज आहे अशा गरजवंतांना विविध संस्थांमध्ये पंचायत समितीमध्ये जिल्हा परिषदेमध्ये दाजींनी नोकरी दिली. सिन्नर तालुक्याचे माजी आमदार सूर्यभान गडाख, महाराष्ट्र राज्याचे माजी मंत्री तुकाराम दिघोळे क्रांतिवीर वसंतराव नारायणराव नाईक यांच्या खांद्याला खांदा लावून सिन्नरच्या विकासासाठी सतत 50 वर्ष काम केले.

असा विकासाचा महामेरू, एक शांत, संयमी व्यक्तिमत्व, निष्कलंक व सात्विक व्यक्तिमत्व आज काळाच्या पडद्याआड गेले. असंख्य हजारो तरुणांचे आदर्श , एक सच्चा वकील तसेच अनेकांना रोजगार देणारा हा दाता आज पडद्याच्या आड गेल्याने अनेकांना अश्रू अनावर झाले होते.

सुदाम दाजी यांना आदरांजली वाहण्यासाठी सकाळपासूनच सिन्नर येथील त्यांच्या निवासस्थानी तानाजी चौकात सामाजिक राजकीय सांस्कृतिक शैक्षणिक अशा विविध स्तरातील नागरिकांची अलोट गर्दी दिसून आली अनेकांचे कैवारी असलेले सांगळे कुटुंबीय आज दुःखाच्या सागरात बुडाले आहेत असेल मी नसेल मी माझ्या कार्यातून दिसेल मी अशा या वाक्याचा बोध घेऊन सुदाम दाजी यांचे कार्य सतत तरुणांना दिशा नक्कीच देत राहतील.