जुने नाशिक : पोलिस आयुक्तांकडून धार्मिक स्थळांवर भोंगे लावण्यासाठी पोलिसांची परवानगी घेण्याचे आदेश पारित केले आहे. त्यानिमित्ताने भद्रकाली पोलिस ठाण्यात पहिला अर्ज दाखल झाला आहे. स्थानिक पोलिस ठाण्यामार्फत केवळ नोंदणी करून ‘ना हरकत’ (NOC) प्रमाणपत्र देण्यात येणार आहे. त्यानंतरच पोलिस आयुक्तालयातून परवानगी मिळणार आहे.

पोलिस आयुक्त दीपक पांडे (CP Deepak Pande) यांनी सर्व धार्मिक स्थळांवर भोंगे लावण्यासाठी अधिकृत परवानगी घेण्याचे आदेशित केले आहे. परवानगी न घेता भोंगे लावल्यास संबंधितावर कारवाई करण्यात येणार आहे. त्यानिमित्त भद्रकाली पोलिस ठाण्यात ना हरकत प्रमाणपत्रासाठी (NOC) बागवानपुरा भागातील कादरी मशिदीचे विश्वस्त हाजी आरिफ सय्यद यांच्याकडून अर्ज दाखल करण्यात आला आहे. हा पहिलाच अर्ज असल्याचे पोलिसांकडून सांगण्यात आले. शिवाय परवानगी पोलिस आयुक्तालयाकडून मिळणार आहे.

संबंधित पोलिस ठाण्यात केवळ ना हरकत प्रमाणपत्र मिळणार आहे. हे प्रमाणपत्र जोडून आयुक्तालयात नवीन अर्ज दाखल केल्यास आयुक्तालयाकडून अधिकृत परवानगी मिळणार असल्याचे सांगण्यात आले. आयुक्तांच्या (CP) आदेशानंतर धार्मिक स्थळांचे विश्वस्त मंडळ ॲक्शन मोडमध्ये आले आहे. त्यांच्याकडून अशाप्रकारे अर्ज केले जात आहे. इतकेच काय तर छोटे-मोठे धार्मिक कार्यक्रम, पूजा करावयाची असेल तरी विश्वस्त परवानगी घेण्यासाठी येत असल्याने पोलिस आयुक्तांच्या आदेशाचा चांगलाच वचक पडला असल्याचे जाणवत आहे. भद्रकाली पोलिस ठाणे हद्दीत धार्मिक शिक्षण देणाऱ्या संस्थेसह १०८ विविध धार्मिक स्थळ आहे.

असे आहे धार्मिक स्थळ

धार्मिक स्थळ संख्या (सुमारे)

मशीद २१

मंदिर ३०

दर्गा ४२

बौद्ध विहार ०२

गुरुद्वारा ०२

चर्च ०२

मदरसा( धार्मिक शिक्षण संस्था) १०