Nashik Crime News : सातपूरच्या अशोकनगर येथील मॉडर्न हायस्कूलमागे राहणारे यश फोटो स्टुडिओचे संचालक अविनाश महाले व कुटुंबीयांच्या बंगल्यामध्ये मंगळवारी (ता. ९) रात्री धाडसी घरफोडी झाली.

यात सहा लाख रुपयांचे सोने व चांदीचे दागिने व रोख रक्कम चोरट्यांनी पळविली. (theft in state employees society nashik crime news)

अशोकनगर येथील राज्य कर्मचारी वसाहतीमधील इंडियन टूल सोसायटीमध्ये राजस बंगल्यात राहात असलेल्या यश फोटोचे संचालक अविनाश महाले, सुजित महाले व त्यांचे वडील राजधर महाले कुटुंबासह राहतात. दोन दिवसांपूर्वी त्यांच्या नातेवाइकांच्या लग्नानिमित्ताने संपूर्ण महाले कुटुंब गावी गेले होते.

याच दरम्यान संशयितांनी संधी साधून मंगळवारी रात्रीच्या सुमारास बंगल्याचा कडीकोयंडा तोडून आत प्रवेश करत कपाटाचे व ड्रॉव्हरचे कुलूप तोडून सुमारे साडेसहा लाखाचे दागिने व वीस हजार रुपये अशी रक्कम घेऊन फरारी झाले.

दरम्यान महाले कुटुंब गावावरून बंगल्याजवळ येताच बाहेर टेहेळणी करत असलेल्या संशयितांनी आतमधील चोरट्यांना खबर दिली आणि चोरट्यांनी साडेसहा लाखांचे दागिने व रोख रक्कम घेऊन शेजारील जगताप यांच्या कंपाउंडमध्ये उडी मारून फरारी झाले.

रात्री नऊपासून एक संशयित फोनवर बोलण्याचे नाटक करून बंगल्यावर नजर ठेवून टेहेळणी करत असल्याचेही निदर्शनास आल्याचे शेजारील महिलांनी सांगितले. घटनेची खबर मिळताच सातपूर पोलिस घटनास्थळी दाखल झाले. संबंधित घटनेचा तपास सहाय्यक आयुक्त शेखर देशमुख व सातपूरचे वरिष्ठ पोलिस निरीक्षक पंकज भालेराव यांच्या मार्गदर्शनाखाली सातपूर पोलिस करत आहेत.