जुने नाशिक : फाळके रोडवरील नाशिक एंटरप्राइजेस दुकान फोडल्याची (Robbery) घटना रविवारी (ता. १७) उघडकीस आली. दुकानातील तांब्याची तार आणि पट्ट्या, असा सुमारे ५० हजारांचा ऐवज चोरीला (Stolen) गेला. याबाबत भद्रकाली पोलिस ठाण्यात गुन्हा दाखल झाला आहे. (Theft of copper items by breaking into shop nashik crime Latest Marathi news)

लोखंड बाजार फाळके रोडवरील सलीम लाखानी यांची हार्डवेअरची दुकान आहे. रविवारी पहाटे पावणेपाचच्या सुमारास संशयितांनी दुकानाचे शटर उचकवून आत प्रवेश केला. सुमारे ४० हजार रुपयांच्या तांब्याच्या तारांचे चार बंडल आणि १० हजारांच्या ९ तांब्याच्या पट्ट्या, अशा ५० हजारांच्या वस्तू चोरीस केल्या.

दुकानाचे शटर तुटल्याची माहिती पोलिसांना मिळाली. भद्रकाली गुन्हेशोध पथकाने घटनास्थळी दाखल होत पाहणी केली. दुकानाचे मालकांना भ्रमणध्वनीवरून माहिती दिली. त्यानंतर श्री. लाखानी दुकानात दाखल झाले. दुकानातील वस्तूंची तपासणी केली असता, तांब्याच्या तारांचे बंडल आणि पट्ट्या चोरीस गेल्याचे आढळून आले.

सायंकाळी श्री. लाखानी यांच्या तक्रारीवरून संशयितांविरुद्ध गुन्हा झाला. पोलिसांनी घटनास्थळावरून सीसीटीव्ही फुटेज मिळविले असून, त्यावरून तपास सुरू असल्याची माहिती देण्यात आली. रोड फ्रंट आणि वर्दळीच्या रस्त्यावरील दुकानातून चोरी झाल्याने परिसरातील नागरिकांनी आश्चर्य व्यक्त केले.