नाशिक : भाजीपाला खरेदी करून घराकडे परतणाऱ्या पादचारी वृद्धेची पर्स पाठीमागून आलेल्या चोरट्याने बळजबरीने खेचून पोबारा केल्याचा प्रकार घडला. मखमलाबाद रोडवर भरदिवसा घडलेला सदरचा प्रकार एका इमारतीच्या सीसीटीव्हीमध्ये कैद झाला आहे.(Thieves snatching elder woman purse on Makhmalabad Road was caught on CCTV Latest Marathi News)

या घटनेमुळे ज्येष्ठांच्या सुरक्षिततेचा प्रश्‍न ऐरणीवर आला आहे. पंचवटी पोलिसांचे गस्ती पथक या परिसरात नाही का, असा प्रश्‍न जागरूक नागरिकांकडून उपस्थित केला जात आहे. मंगला मुरलीधर सावंत (रा. पंचवटी) या ६३ वर्षीय महिलेने दिलेल्या फिर्यादीनुसार, गुरुवारी (ता.२२) सायंकाळी मखमलाबाद रोडवरील विठ्ठल-रुक्मिणी मंगल कार्यालय परिसरात आल्या होत्या. भाजीपाला खरेदी केल्यानंतर सायंकाळी मखमलाबाद रोडने त्यांच्या घराकडे पायी निघाल्या होत्या.

रस्त्यावरील सेजल पार्कसमोर त्या आल्या असता, पाठीमागून टोपी घातलेला संशयित युवक आला आणि हातातील पर्स बळजबरीने हिसकावू लागला. या वेळी दोघांमध्ये झटापटही झाली. संशयिताने झटका देऊन त्यांच्या हातातील पर्स व मोबाईल हिसकावून पोबारा केला. सावंत यांनी आरडाओरडा केला. परंतु, सदर रस्त्यावर फारशी वर्दळ नसल्याने संशयित पसार झाला.

पर्समध्ये ४ हजार रुपये रोख, मोबाईल व एटीएम कार्ड, असे १४ हजार रुपयांचा ऐवज चोरट्याने चोरून नेला आहे. सदर प्रकार सेजल पार्क या इमारतीला असलेल्या सीसीटीव्हीमध्ये कैद झाला आहे. सीसीटीव्हीतील संशयिताचा पोलिस शोध घेत आहेत. याप्रकरणी पंचवटी पोलिसात लुटीचा गुन्हा दाखल करण्यात आला आहे. दरम्यान, पोलिस ठाणेनिहाय गस्ती पथके नेमलेले असतानाही भरदिवसा असा लुटीचा प्रकार घडल्याने पोलिसांचे गस्ती पथक करतात तरी काय, असा प्रश्‍न जागरूक नागरिकांकडून उपस्थित केला जात आहे.