जातेगाव (जि. नाशिक) : तालुक्यातील घाटमाथ्यावरील जातेगाव येथील डोंगरावरील श्री क्षेत्र पिनाकेश्‍वर महादेव मंदिरातील दोन दानपेट्या फोडून चोरट्यांनी त्यातील रोख रकमेवर डल्ला मारला. सदर घटना सीसीटीव्हीत कैद झाली असून, चोरट्यांवर गुन्हा दाखल करण्यात आला आहे.

चोरीची घटना सीसीटीव्हीत कैद

जातेगाव डोंगरावरील श्री पिनाकेश्‍वर महादेव मंदिर देवस्थान अतिप्राचीन असून, असंख्य भाविकांचे श्रद्धास्थान आहे. शुक्रवारी (ता. १८) रात्री ९ ते १० च्या दरम्यान मंदिराच्या उघड्या गाभाऱ्यातील व सभामंडपातील एकूण दोन सीलबंद दानपेट्या चोरट्यांनी मंदिर परिसराबाहेर चोरुन नेऊन फोडल्या. त्यातील रोख रक्कम अंदाजे एक लाख रुपये चोरी केली. एक रिकामी दानपेटी परिसरातील १०० मीटर अंतरावर व दुसरी दानपेटी मंदिरापासून ५०० मीटर अंतरावर आढळून आली. चोरीची घटना सीसीटीव्हीत कैद झाली. त्यात दोन चोरटे मंदिरात चोरी करताना आढळून आले. पहाटे पूजा विधीसाठी आलेल्या पुजारी व भाविकांना दानपेट्यांची चोरीची झाल्याचे लक्षात आले. देवस्थानचे विश्‍वस्त ज्ञानेश्वर चव्हाण यांनी पोलिस प्रशासनाला कळविल्यानंतर पोलिस निरीक्षक रामेश्‍वर गाडे, पोलिस उपनिरीक्षक मनोज वाघमारे यांनी तातडीने घटनास्थळी दाखल होऊन घटनेची पाहणी केली. नांदगाव पोलिस ठाण्यात चोरट्यांवर गुन्हा दाखल करण्यात आला असून, पोलिस उपनिरीक्षक मनोज वाघमारे यांच्या मार्गदर्शनाखाली पोलिस करीत आहेत.

ग्रामस्थांकडून घटनेचा निषेध

श्री क्षेत्र पिनाकेश्‍वर महादेव देवस्थानात चोरट्यांनी हेतुपुरस्कर केलेली चोरी म्हणजे आराध्य दैवतेचा व भाविकांच्या श्रद्धा, भावनेचा झालेला अपमान आहे. अशा दुष्टप्रवृत्तींचा जाहीर निषेध करण्यात येत असून, लवकरात लवकर चोरट्यांचा शोध घेऊन त्यांना शिक्षा करण्यात यावी, अशी भावना स्थानिक नागरिकांनी व्यक्त केली आहे.