सोग्रस (जि. नाशिक) : चांदवड तालुक्यातील पाथरशेंबे शिवारात पाण्याच्या शोधात असलेल्या तहानलेल्या मोराचा विहिरीत पडून पाण्यात बुडून मृत्यू झाल्याची घटना शुक्रवारी (ता. ३) दुपारच्या सुमारास घडली.

दत्तू ठाकरे (रा. पाथरशेंबे) यांच्या गट नंबर ३१७ मधील विहिरीत दुपारच्या सुमारास दोन ते अडीच वर्षे वयाच्या मोराचा मृतदेह आढळून आला. यासंदर्भात ठाकरे यांनी चांदवड वन विभागाच्या कार्यालयात कळविले. घटनास्थळी वन विभागाच्या कर्मचाऱ्यांनी येऊन मोराचा मृतदेह विहिरीतून बाहेर काढला. पशुवैद्यकीय अधिकाऱ्यांनी शवविच्छेदन करून चांदवड वन विभागाच्या वसाहतीमधील मोकळ्या जागेत मोरावर अंत्यसंस्कार केले.