नाशिक : केंद्र सरकारच्या सुचनांनुसार शहरात शनिवार (ता. १६)पासून कोव्हीडशील्ड लसीकरणाला सुरवात होणार आहे. एका व्यक्तीला २८ दिवसांच्या अंतराने दोनदा लसीकरण करावे लागणार असल्याने त्यानुसार पहिल्या टप्प्यात ७२०० आरोग्य कर्मचाऱ्यांचे लसीकरणाचे नियोजन झाले आहे. शहरात तीन लसीकरण केंद्रांवर लसीकरण मोहीम राबविली जाणार आहे. 

महिन्याला १२ दिवस लसीकरण

केंद्र सरकारकडून सोळा१६ हजार लसी प्राप्त झाल्या असून, महापालिका मुख्यालयातील शीतपेटीत किट ठेवले आहेत. आठवड्यातून चार दिवस याप्रमाणे महिन्याला १२ दिवस लसीकरण मोहीम राबविली जाईल. एका लसीकरण केंद्रात प्रत्येकी शंभरप्रमाणे ३०० आरोग्य कर्मचाऱ्यांना लस दिली जाईल. जुने व नवीन बिटको व पंचवटी कारंजावरील इंदिरा गांधी रुग्णालयात लसीकरण होईल. केंद्रातील आरोग्य तसेच प्राथमिक आरोग्य केंद्रातील कर्मचाऱ्यांना लस दिली जाणार आहे. १६ हजार लस किट प्राप्त झाल्या असल्या, तरी दहा टक्के गळती लक्षात घेऊन साधारण १४ हजार ४०० लस दिल्या जातील. एका व्यक्तीला दोन डोस दिले जाणार असल्याने १४, ४०० किटनुसार ७,२०० आरोग्य कर्मचाऱ्यांना लस दिली जाईल. लस टोचल्यानंतर संबंधित रुग्णाला त्रास जाणवू लागल्यास संदर्भ व मविप्रच्या मेडीकल कॉलेजमध्ये भरती केले जाणार आहे.   

हेही वाचा > लॉजमध्ये सापडला प्रेयसीचा मृतदेह अन् घाबरलेला प्रियकर; काय घडले चार भिंतीत?

हेही वाचा >  देवी भक्ताच्या बँक खात्यावरही पडली वाईट नजर; महाराष्ट्रात परतताच प्रकार उघडकीस