मालेगाव : शहरातील जुन्या महामार्गावरील पंचगंगा ऑटोसमोर एकाला चाकूचा धाक दाखवून त्याच्याजवळील नऊ हजाराचा मोबाईल व एक हजार रूपयांची रोकड लुटणाऱ्या दुचाकीवरून आलेल्या तिघा सराईत मोबाईल चोरट्यांना छावणी पोलिसांनी दुचाकी क्रमांकाच्या आधारे अवघ्या तीन तासात अटक केले.

पोलिसांनी संशयितांकडून सात मोबाईल, एक हजार रुपये रोख व दुचाकी जप्त केली आहे. (Three mobile thieves arrested in just 3 hours 7 mobiles along with cash two wheeler also seized Nashik Crime)

जुन्या महामार्गावर कृष्णा दिनेश शेठ (२५, रा. शांतीनगर, मखमलाबाद, नाशिक) हा तरुण टेम्पो उभी करून लघुशंका करीत असताना दुचाकीवर आलेल्या तिघा संशयितांनी त्याला चाकूचा धाक दाखवत जिवे ठार मारण्याची धमकी देत विवो मोबाईल व एक हजार रुपये जबरदस्तीने हिसकावून घेतले.

संशयित दुचाकीवरुन फरार झाले. कृष्णाकडून छावणी पोलिसांनी संशयितांचे वर्णन विचारले असता त्याने मोबाईल चोरटे दुचाकीवर (एमएच ४१ बीसी ७६२०) फरार झाल्याचे सांगितले.

पोलिस निरीक्षक रघुनाथ शेगर, उपनिरीक्षक भगवान कोळी, उपनिरीक्षक सचिन चौधरी आदींनी हवालदार शरद भूषण, पोलिस नाईक प्रसाद देसले, कैलास चोथमल, शांतीलाल जगताप, किरण पाटील, संदीप राठोड आदींच्या पथकाने दुचाकी क्रमांकाच्या आधारे माहिती काढून मजहर शरिफखान (२५, रा. गुरुवार वार्ड), शहजाद अख्तर हमीद खान (१९), मोहम्मद इरफान खलील अहमद (२०, दोघे रा. गुलशेरनगर, मालेगाव) या तिघांना अटक केली.

त्याच्याजवळून सात मोबाईल, एक हजार रुपये रोख व गुन्ह्यात वापरलेली दुचाकी जप्त करण्यात आली. संशयितांना न्यायालयाने दोन दिवसांची पोलिस कोठडी दिली आहे. शहर व परिसरात भरधाव दुचाकीवर येत मोबाईल चोरण्याचे प्रमाण वाढले आहे.

त्या पाश्‍र्वभूमीवर या चोरट्यांची कसून चौकशी करण्यात येत आहे. त्यांनी आणखी काही गुन्हे केले, की काय याचा शोध घेण्यात येत असल्याचे अप्पर पोलिस अधिक्षक भारती, निरीक्षक शेगर यांनी सांगितले.