Nashik News : सांज समयी सूर निरागस गगनी गुंजला अन् मंत्रमुग्ध रसिक स्वर सागरात डुंबला... निमित्त ठरले शंकर महादेवन यांच्या गायनाचे. दीपक बिल्डर्स आणि नाशिक सायकलिस्ट फाउंडेशन आयोजित तीर्थ विठ्ठल संगीत मैफलीचा नाशिककर रसिकांनी आस्वाद घेतला.

रविवारी (ता.२८) गोविंद नगर येथील दीपक बिल्डर्सच्या थ्री लिव्ह्ज् या प्रकल्पाठिकाणी या संगीत मैफलीचे आयोजन केले होते. (Tirtha Vitthal Sangeet Concert by Deepak Builders and Developers nashik news)

याप्रसंगी देवकी पंडित, रंजनी व गायत्री यांनीही आपल्या गायनाने मैफलीत रंग भरले. प्रारंभी दीपक बिल्डर्सचे दीपक चंदे, नाशिक सायकलिस्टचे हरीश बैजल, मनिषा रौंदळ, किशोर काळे, केवल टेंभरे व आदी मान्यवरांच्या हस्ते विठ्ठल प्रतिमेचे पूजन व तुळशीला पाणी वाहून कार्यक्रमाचा श्री गणेशा केला.

मैफलीची सुरवात देवकी पंडित यांच्या स्वरांनी झाली. अबीर गुलाल, पंढरीचे सुख पाहता डोळा, पाहावा विठ्ठल असे अभंग सादर करत त्यांनी रसिकांना विठ्ठल भक्तीत तल्लीन केले. त्यानंतर रंजनी व गायत्री या भगिनींनी रुप पाहता लोचनी, व्यंकटाचनिलया यांसह संत ज्ञानेश्वर, संत तुकाराम, कान्होपात्रा, पुरंदरदास यांचे अभंग आपल्या स्वरांत गायले.

रसिकांना उत्कंठा होती ती शंकर महादेवन यांना ऐकण्याची... वक्रतुंड महाकाय या गणेशस्तुतीने आपल्या गायनाला सुरवात केल्यानंतर एकदंताय वक्रतुंडाय अन् शिवतांडव स्तोत्राने शंकर महादेवन यांनी मैफलीत रसिकांच्या अंगावर शहारे आणले. त्यांच्या सुरांनी आसमंतातून भक्तीरसाचा वर्षाव रसिकांवर होत होता.

कट्यार काळजात घुसलीमधील सूर निरागस हो या गीताने उपस्थितांची मने जिंकली. प्रसाद पाध्ये, आदित्य ओक, साई गिरिधर, यश आकाश, चेतन परब, सुश्मिता दवाळकर, सुखद मुंडे, सौमिल यांनी वादनाची साथसंगत दिली. स्वानंद बेदरकर यांनी निवेदन केले.

दीपक बिल्डर्सचा तीन दशकांचा प्रवास

तीर्थ विठ्ठल या संगीत मैफलीचे प्रायोजक दीपक बिल्डर्सचा ३५ वर्षांचा यशस्वी प्रवास चित्रफितीद्वारे दाखविण्यात आला. सन १९८९ ला सुरु झालेला दीपक बिल्डर्सचा प्रवास आज तीन दशकांनंतर नाशिकच्या विकासात आपला मोलाचा वाटा देत आहे. शहरात १५ पेक्षा अधिक प्रकल्पांचे निर्माण सुरु असून ५ प्रकल्प लवकरच नाशिककरांच्या भेटीला येणार असल्याची माहिती शुभ चंदे यांनी दिली.