रामवाडी पुलाखाली आढळले मृत अर्भक नाशिक : पंचवटीतील रामवाडी पुलाखाली गोदावरी नदीपात्राजवळ एक नवजात पुरुष जातीचे अर्भक मृतावस्थेत आढळून आले. याप्रकरणी पंचवटी पोलिस ठाण्यात अज्ञात संशयिताविरोधात गुन्हा दाखल करण्यात आला आहे. गस्तीवर असलेले बीट मार्शल किसन गायकवाड आणि भूषण साळवे यांना एका नागरिकाने पुलाखाली बाळ असल्याची माहिती दिली. पोलिसांनी तातडीने धाव घेतली असता, झाडीझुडपांत एक नवजात बालक बेशुद्ध अवस्थेत सापडले. परिसरात त्याच्या पालकांचा शोध घेण्यात आला, मात्र कोणीही आढळले नाही. पोलिस उपनिरीक्षक सचिन चव्हाण व अतिरिक्त पथकाने बाळाला तत्काळ उपचारासाठी जिल्हा रुग्णालयात दाखल केले. मात्र, तपासणीअंती वैद्यकीय अधिकाऱ्यांनी त्यास दाखल करण्यापूर्वीच मृत घोषित केले. पोलिसांनी पंचनामा करत अज्ञात जन्मदात्यांविरुद्ध गुन्हा दाखल केला असून, पुढील तपास सुरू आहे. --