फोटो : १९२३३ --- आधार संलग्न हजेरीला पशुवैद्यकीय डॉक्टरांचा विरोध सकाळ वृत्तसेवा नाशिक, ता. १४ : आधार संलग्न बायोमेट्रिक हजेरी (एईबीएएस) या प्रणालीला पशुवैद्यकीय डॉक्टरांनी विरोध केला आहे. राजपत्रित पशुवैद्यक संघटना व पशुचिकित्सा व्यवसायी संघटनेच्या पदाधिकाऱ्यांनी या संदर्भात शासनाला पत्र दिले आहे. पशुवैद्यकीय डॉक्टर हे ग्रामीण भागात कार्यरत आहेत. त्यांना मोबाईलवर हजेरी द्यायची झाल्यास ‘एईबीएएस’ वापरताना नेटवर्क अभाव, तांत्रिक अडचणी, मोबाईल नोंदणीची सक्ती, क्षेत्रीय दौरे व आपत्कालीन सेवांमध्ये अडथळे निर्माण होण्याची शक्यता आहे. परिणामी विभागाच्या दैनंदिन कार्यक्षमतेवर, तसेच जनतेला दिल्या जाणाऱ्या पशुवैद्यकीय सेवांवर विपरीत परिणाम होऊ शकतो. या पार्श्वभूमीवर पशुसंवर्धन विभागाच्या आयुक्तांसह सचिवांना निवेदन दिले. नाशिकमध्ये दोन्ही संघटनांच्या वतीने जिल्हा पशुसंवर्धन उपआयुक्त डॉ. प्रशांत धर्माधिकारी यांना निवेदन देण्यात आले.