संक्षिप्त खानदेशात कापूस लागवडीची तयारी जळगाव : खानदेशात पूर्वहंगामी किंवा बागायती कापसाची लागवड २० मे नंतर सुरू होईल, असे दिसत आहे. कृषी विभागाने बियाणे विक्री यंदा १५ मे नंतर अधिकृतपणे सुरू होईल, असे म्हटले आहे. कापूस लागवड १ जूनपासून करण्याचे आवाहन केले आहे, पण मागील हंगामाप्रमाणे यंदाही या आवाहनास कुठलाही प्रतिसाद खानदेशात मिळणार नाही, अशी स्थिती आहे. कापूस लागवड २० मेनंतर करण्याचे नियोजन अनेक शेतकऱ्यांनी केले असून, पीक पावसाळ्यापूर्वी बऱ्यापैकी तयार व्हावे, असे नियोजन यामागे आहे. काळ्या कसदार जमिनीत ही लागवड केली जाईल. लवकर लागवड केल्यास पीक दिवाळी सणाला वेचून पूर्ण होते. लागलीच क्षेत्र रिकामे करून त्यात अन्य रब्बी पिके व्यवस्थित, वेळेत घेणे शक्य होते, शिवाय कापसाची लागवड २० मे नंतर किंवा २५ मे पूर्वी केल्यास या पिकात गुलाबी बोंड अळीचा शिरकाव कमी असतो, सुरवातीला निकोप बोंडे हाती येतात, असे शेतकरी मानतात. यामुळे लागवड २० मेनंतर सुरू होईल, असे दिसत आहे.