धुळे जिल्ह्यात मॉन्सूनचे आगमन सकाळ वृत्तसेवा धुळे, ता. २२ : मृग नक्षत्राच्या अखेरच्या दिवशी सोमवारी (ता. २२) धुळे शहरासह जिल्ह्यात ठिकठिकाणी मॉन्सूनने हजेरी लावली. यामुळे उकाड्याने हैराण नागरिकांना दिलासा मिळाला असून, वातावरणात गारवा निर्माण झाला आहे. धुळे शहरात रविवारी (ता. २१) मध्यरात्री व सोमवारी दुपारी पावसाचा हलका शिडकावा झाला. लामकानी व बोरीस (ता. धुळे) परिसरातही पावसाने हजेरी लावली. साक्री तालुक्यातील पिंपळनेर व पश्चिम पट्ट्यात विजांच्या कडकडाटासह सुमारे अडीच तास मुसळधार पाऊस झाला. यामुळे पिंपळनेर भागात रस्ते व सखल भाग जलमय झाले; तर काही काळ वीजपुरवठा खंडित झाला होता. दुसरीकडे, पिंपळनेर (ता. साक्री) व सोनगीर (ता. धुळे) आणि शिरपूर परिसरात दुपारी अर्धा तास पावसाच्या सरी कोसळल्या. जमीन अद्याप तापलेली असल्याने पेरण्यांसाठी हा पाऊस अपुरा असून, शेतकऱ्यांना आता दमदार पावसाची प्रतीक्षा आहे. तरीही त्याच्या या पहिल्या हजेरीमुळे बळीराजाच्या आशा पल्लवित झाल्या.