संक्षिप्त ‘महाटीइटी’ पार्श्वभूमीवर प्रतिबंधात्मक आदेश जळगाव : महाराष्ट्र शिक्षक पात्रता परीक्षा महाटीइटी रविवारी (ता. २८) शहरातील ३० परीक्षा केंद्रांवर होणार असल्याने प्रशासनाने कडक प्रतिबंधात्मक उपाययोजना लागू केल्या आहेत. परीक्षेदरम्यान गैरप्रकारांना आळा घालण्यासाठी आणि ‘कॉपीमुक्त अभियान’ प्रभावीपणे राबविण्यासाठी हा निर्णय घेण्यात आला आहे. अपर जिल्हादंडाधिकारी वैशाली चव्हाण यांनी भारतीय नागरी सुरक्षा संहिता, २०२३ च्या कलम १६३ अन्वये आदेश जारी केले आहेत. त्यानुसार, रविवारी (ता. २८) सकाळी ८ ते सायंकाळी ५ या कालावधीत सर्व परीक्षा केंद्रांच्या १०० मीटर परिसरात अनधिकृत व्यक्तींना प्रवेशबंदी राहणार आहे. मात्र, परीक्षार्थी, नियुक्त अधिकारी-कर्मचारी, पोलिस व होमगार्ड यांना या आदेशातून सूट देण्यात आली आहे. याशिवाय, परीक्षा केंद्रांच्या ५०० मीटर परिसरातील सर्व झेरॉक्स दुकाने संबंधित कालावधीत बंद ठेवण्याचे निर्देश देण्यात आले आहेत.