धुळे ः टुडे १ साठी -- कावठे शिवारामध्ये ९० हजारांची घरफोडी धुळे ः कावठे (ता. साक्री) शिवारातील शेतात असलेल्या घरातून चोरट्याने कोठीचे कुलूप तोडून ७० हजार रुपये किंमतीची चांदी आणि २० हजार रुपयांची रोख रक्कम, असा एकूण ९० हजार रुपयांचा मुद्देमाल लांबविल्याची घटना घडली आहे. याप्रकरणी साक्री पोलिस ठाण्यात गुन्हा दाखल करण्यात आला असून, पोलिसांनी अवघ्या काही तासांतच चोरट्याला गजाआड केले. कावठे शिवारात सुभाष बोरसे यांचे शेत असून, तेथे कालशा पराडके (वय ५३) वास्तव्यास आहेत. यात २९ ऑगस्टला दुपारी बाराच्या सुमारास चोरट्याने घरातील कोठीचे कुलूप तोडून आत ठेवलेली ७० हजार रुपये किंमतीची ७० भार चांदी आणि २० हजारांची रोकड, असा ९० हजारांचा मुद्देमाल नेला. याबाबत कालशा पराडके यांच्या फिर्यादीवरून साक्री पोलिस ठाण्यात गुन्हा दाखल करण्यात आला. गुन्ह्याचा तपास करत असताना साक्री पोलिसांनी तपासाची चक्रे वेगाने फिरवून कुंदन ऊर्फ भुर्या हिरामण राठोड (वय २६, रा. वंजार तांडा, ता. साक्री) या संशयितास १ सप्टेंबरला अटक केली आहे. पोलिस उपनिरीक्षक वळवी तपास करत आहेत.