अमली पदार्थांविरोधात रील स्पर्धेचे आयोजन सकाळ वृत्तसेवा नाशिक, ता. २३ : जागतिक अमली पदार्थ विरोधी दिनानिमित्त नाशिक शहर पोलिस आयुक्तालयाच्या वतीने अमली पदार्थ विरोधी जनजागृती रील स्पर्धेचे आयोजन करण्यात आले आहे. तरुणांमध्ये अमली पदार्थांच्या दुष्परिणामांविषयी जनजागृती करण्यासाठी पोलिस आयुक्त संदीप कर्णिक यांनी नागरिक, विद्यार्थी आणि कंटेंट क्रिएटर्सना कल्पक रील्स तयार करण्याचे आवाहन केले आहे. या स्पर्धेतील पहिल्या तीन उत्कृष्ट रील्सना अनुक्रमे २१ हजार, १५ हजार आणि ११ हजार रुपये, तर अन्य १० स्पर्धकांना प्रत्येकी ५ हजार रुपयांचे उत्तेजनार्थ पारितोषिक व प्रशस्तीपत्रक देऊन गौरविण्यात येईल. तसेच सर्व सहभागींना प्रमाणपत्र दिले जाईल. रील सादर करण्याची अंतिम मुदत २५ जून रोजी रात्री पावणेबारापर्यंत असून, रील अपलोड करताना (#NashikAgainstNarcotics) हा हॅशटॅग वापरून शहर पोलिसांच्या अधिकृत हँडल्सना टॅग करणे बंधनकारक आहे. अमली पदार्थमुक्त समाज घडवण्यासाठी या मोहिमेत सर्वांनी उत्स्फूर्त सहभाग नोंदवावा, असे आवाहन पोलिस आयुक्तालयाने केले आहे. ---