सोनगीरला गणेश दर्शनासाठी गर्दी सोनगीर, ता. १६ : येथील सर्व गणेश मंडळांचा दर्शनासाठी गावात उत्साह दिसत असून, ‘चांगला पाऊस पडू दे, शेत शिवार बहरू दे’ अशी मनोकामना केली जात आहे. तीन मंडळाना गणेशोत्सव साजरा करण्याचे पन्नासहून अधिक वर्षे झाले आहे. अनेक मंडळांनी २५ वर्षे पार केली आहेत. यंदा देखावे कमी पण मंडळांनी भव्य व अत्यंत सुंदर विलोभनीय गणेश मुर्ती, आकर्षक विद्युत रोषणाईवर भर दिला आहे. यंदा गणेश आगमनापासूनच उत्सवाची धूम असली तरी प्रत्येक मंडळाने मोठ्या देखाव्यांना फाटा दिला आहे. बहूतेक मंडळांनी गावातून वर्गणी गोळा करण्याचे टाळले. मंडळाच्या सदस्यांकडून जमलेल्या निधीवरच गणेशोत्सव साजरा करीत आहेत. मंडळांनी दोंडाईचा, नंदूरबार, धुळे, मध्यप्रदेशातील बऱ्हाणपूर व स्थानिक ठिकाणाहून भव्य गणेशमूर्ती आणल्या आहेत. काही मुर्तींची किंमत ४० ते ७० हजार पर्यंत उंची १४ ते १५ फुटांपर्यंत आहेत. भव्य मंडप व आकर्षक विद्युत रोषणाईने गाव झगमगले आहे. मंडळाकडून रात्री विविध स्पर्धांचे आयोजन केले जात आहे. काही मंडळातील सदस्य ढोल ताशांच्या गजरात रात्री उशिरापर्यंत लेझीम खेळताना दिसून येतात.