नाशिक : पेठे शाळेच्या पाठीमागील दुकानाचे शटर उचकटून रोकड व मोबाईल चोरी करणाऱ्या दोघा घरफोड्यांना शहर गुन्हेशाखेच्या युनिट एकच्या पथकाने सापळा रचून अटक केली आहे.

संशयितांकडून आणखीही गुन्ह्यांची उकल होण्याची शक्यता पोलिसांनी व्यक्त केली आहे. (two burglars arrested Performance of Unit One Nashik Crime)

विशाल संजय कंक (२३, रा. खालचे चुंचाळे, अंबड), दीपक शाम वाघारे (२३, रा. गंगापूरगाव) अशी दोघा संशयित घरफोड्यांची नावे आहेत.

गेल्या सोमवारी (ता.२२) मध्यरात्री चोरट्यांनी पेठेशाळेच्या मागे असलेल्या गुरुचार्य सुगंधालय अगरबत्ती या दुकानाचे शटर उचकटून रोकड व मोबाईल चोरून नेत घरफोडी केली होती. याप्रकरणी सरकारवाडा पोलिसात गुन्हा दाखल आहे.

सदरील गुन्ह्याचा समांतर तपास शहर गुन्हेशाखेचे युनिट एकचे पथक करीत होते. हवालदार रमेश कोळी यांनी परिसरातील सीसीटीव्ही फुटेज तपासत संशयिताचा माग काढला.

त्यावेळी संशयित हे घारपुरे घाट परिसरात येणार असल्याची खबर मिळाली होती. त्यानुसार पोलीस निरीक्षक विजय ढमाळ यांच्या मार्गदर्शनाखाली उपनिरीक्षक चेतन श्रीवंत, वसंत पांडव, रमेश कोळी, धनंजय शिंदे, जगेश्वर बोरसे, अमोल कोष्ठी, अप्पा पानवळ, राजेश राठोड यांनी सिद्धेश्वर मंदिराजवळ सापळा रचून दोघा संशयितांना शिताफीने अटक केली.

चौकशीत संशयितांनी गुन्ह्याची कबुली दिली. त्यांच्याकडून १३ हजारांचे दोन मोबाईल जप्त करण्यात आले आहेत. संशयित विशाल कंक याच्याविरोधात सातपूर पोलिसातही चोरीचा गुन्हा दाखल असून, त्यांच्याकडून आणखीही गुन्ह्यांची उकल होण्याची शक्यता आहे