पंचवटी : पंचवटी, हिरावाडीतील वाल्मीक आवास योजनेतील मामा-भाच्याच्या भांडणात शुक्रवारी (ता. १५) भाच्याने मामाला धक्काबुक्की करत पलंगावरून लोटून दिले होते. यात मामाच्या डोक्यास गंभीर मार लागून उपचारास नेतानाच त्यांचा मृत्यू झाला होता.

शनिवारी (ता. १६) पंचवटी पोलिसांत प्रथम अकस्मात मृत्यूची नोंद करण्यात आली होती. मात्र, शवविच्छेदन अहवाल प्राप्त झाल्यानंतर संशयित भाच्याविरोधात सदोष मनुष्यवधाचा गुन्हा दाखल केला असून, संशयिताला ताब्यात घेण्यात आले आहे. (Uncle dies after being pushed by nephew Crime of culpable homicide suspect in custody Nashik Crime)

इंदूबाई खाणे (रा. साक्री, धुळे) यांनी दिलेल्या तक्रारीनुसार, संशयित मच्छिंद्र सुखदेव मानभाव (वय २७, रा. हिरावाडी) हा दोन महिन्यांपासून मामा बाबूलाल सोमा गावित यांच्याकडे राहात होता.

बाबूलाल गावित हे दोन दिवसांपासून भाचा मच्छिंद्र मानभाव यास, ‘मुलाला चटके लागले, त्याला दवाखान्यात नेण्यास पैसे नाही; पण दारू पिण्याकरिता पैसे आहे, असे बोलल्याचा राग आल्याने संशयित मच्छिंद्र याने मामा बाबूलाल यांना पलंगावरून पाडले.

झाडाची कुंडी छातीवर फेकून मारली. बाबूलाल यांना मार लागल्याने ते बेशुद्ध पडले. गायकवाड आणि नातेवाइकांनी त्यांना सिव्हिल हॉस्पिटलमध्ये उपचारार्थ दाखल केले. मात्र डॉक्टरांनी तपासून मृत घोषित केले.

पंचवटी पोलिस ठाण्यात प्रथम अकस्मात मृत्यूची नोंद करण्यात आली होती. रात्री उशिरा सदोष मनुष्यवधाचा गुन्हा दाखल करण्यात आला. संशयिताला ताब्यात घेण्यात आले आहे. वरिष्ठ निरीक्षक अनिल शिंदे यांच्या मार्गदर्शनाखाली तपास सुरू आहे.