नाशिक रोड : उपनगर भागातील इंद्रप्रस्थ कॉलनीसमोर असलेल्या शौचालयालगत देवी मंदिरात खुलेआम मटक्याचा अड्डा सुरू असून, पोलिस प्रशासन जाणूनबुजून दुर्लक्ष करत असल्याचे स्थानिकांनी आरोप केला आहे. (upanagar open matka adda police neglect Accused by locals Nashik Crime)

नाशिकमध्ये विविध ठिकाणी जुगार अड्डे सर्रास सुरू असल्याबाबतचा प्रश्न हिवाळी अधिवेशनात विधिमंडळामध्ये उपस्थित झालेला असताना उपनगरमधील इंद्रप्रस्थ कॉलनीसमोरील शौचालयालगत देवी मंदिरात अनेक दिवसांपासून मोठ्या प्रमाणात राजरोस बेकायदेशीर मटक्याचा अड्डा सुरू असल्याची तक्रारी स्थानिकांनी केल्या आहेत.

अंकुश शिंदे पोलिस आयुक्त असताना बंद असलेले अवैध धंदे नवनियुक्त आयुक्त आल्यापासून सर्रासपणे सुरु झाल्याचे स्थानिक नागरिकांचे म्हणणे आहे.

या जुगार अड्ड्यांवर सकाळपासून ते रात्री उशिरापर्यंत या ठिकाणी मद्यपी जुगार खेळत असल्याने भाविकांना देवी मंदिरात जाणे तसेच युवती व महिलांना रस्त्याने चालणे मुश्कील बनले आहे.

या ठिकाणी मोठ्या प्रमाणात गर्दी होत असल्याने दिवसागणिक लाखो रुपयांची उलाढाल होत असल्याचा अंदाज व्यक्त केला जात आहे.

दिवसाढवळ्या खुलेआम सुरू असलेल्या मटक्याच्या अड्ड्यावर पोलिस प्रशासनाने अजून कारवाई का केली नाही, असा सवाल स्थानिक उपस्थित करत आहे. पोलिसांच्या आशीर्वादाने हे सर्व चालत असल्याचा निर्वाळा नागरिकांनी दिला आहे.