Vande Bharat Express : मुंबईहून थेट नाशिकमार्गे शिर्डीला जाणारी व शिर्डीहून नाशिकला येणाऱ्या वंदेभारत ट्रेनमुळे टॅक्सी व रिक्षावाल्यांच्या रोजगारात वाढ झाली आहे. यामुळे त्र्यंबकेश्वर व पंचवटी येथील पर्यटन वाढले आहे.

पर्यायाने रिक्षावाल्यांना उच्च प्रतीचे भाडे मिळत असून त्यांच्या रोजगारात वाढ झाल्याचे रिक्षावाल्यांनी ‘सकाळ’ला सांगितले. (Vande Bharat express increased employment of taxis rickshaws Devotees flock to tourist spots nashik news)

वंदेभारत ट्रेन मुंबईहून सकाळी सहा वाजता निघते, तर नाशिकला नऊ वाजता पोचते. ही ट्रेन शिर्डीला अकरा वाजता पोचते. देवदर्शन झाल्यानंतर पुन्हा ही ट्रेन संध्याकाळी सात वाजता नाशिकला असते. ही ट्रेन संपूर्ण एसी असून उच्च सुविधांनी युक्त आहे.

मुंबईकर सकाळी या ट्रेनने निघून नाशिकला नऊ वाजता पोचतात. नाशिकला पंचवटी काळाराम मंदिर, सीता गुंफा त्याचप्रमाणे त्र्यंबकेश्वर येथे दर्शन करून पुन्हा संध्याकाळी सहा वाजता नाशिक रोड रेल्वे स्थानकावर येतात.

यासाठी नाशिक रोड येथील टॅक्सी व रिक्षावाल्यांना सध्या या ट्रेनमुळे प्रवाशांची आवक वाढून चांगला रोजगार मिळत आहे. नाशिक रोड रेल्वे स्थानकावर उतरलेल्या प्रवाशांना सहा तासात पंचवटी बरोबर त्र्यंबकेश्वरचे दर्शन घडत असल्यामुळे ही ट्रेन मुंबईकरांना सोयीची ठरत आहे.

हेही वाचा : Credit Card फसवणूक....काय घ्याल काळजी?

पर्यायाने रिक्षावाल्यांना नाशिक शहरात चांगला रोजगार मिळत आहे. तर टॅक्सीवाल्यांना त्र्यंबकेश्वर- नाशिकचे भाडे चांगले मिळत आहे. नाशिकच्या पर्यटनात वाढ झाल्याने इतर रोजगारही वाढला आहे.

"सध्या ही ट्रेन सकाळी नऊ वाजता मुंबईहून नाशिकला येते. येथून प्रवासी पंचवटी, सीता गुंफा, काळाराम मंदिर आणि त्र्यंबकेश्वर येथे जाणे पसंत करतात. दर्शन झाल्यावर पुन्हा साडेपाच ते सहाच्या दरम्यान नाशिक रोड रेल्वे स्थानकावर ही ट्रेन पकडण्यासाठी येतात. त्यामुळे आम्हाला या पर्यटनातून चांगला रोजगार उपलब्ध होत आहे. शिवाय वेळ वाचवण्यासाठी पर्यटक स्पेशल रिक्षा करतात." - विनोद भदाणे रिक्षा चालक.