कसबे सुकेणे (जि. नाशिक) : परिसरात गेल्या तीन ते चार दिवसापासून तापमानात कमालीची घट झाली असून आज ५.२ एवढ्या तापमानाची नोंद झाली आहे. यामुळे परिसरातील द्राक्ष बागायतदार धास्तावले आहेत.

परिसरात मोठ्या प्रमाणात काळ्या जातीच्या द्राक्षबागा असून या द्राक्षबागांमध्ये पाणी उतरण्यास सुरुवात झाली आहे. (Winter Season Falling temperatures threaten vineyards In Kasbesukene area mercury 5 degrees nashik news)

हेही वाचा : सूर्यकुमार...भारतीय क्रिकेट मधला 'लंबी रेस का...'

पारा मोठ्या प्रमाणात घसरल्याने द्राक्षबागांच्या मण्यांना तडे जाण्याची भीती निर्माण झाली आहे. घसरत्या तापमानामुळे द्राक्षबागांचे संरक्षण करण्यासाठी विशिष्ट औषधांची फवारणी करणे, रात्रीच्या वेळी ठिबक सिंचनाद्वारे बागेला पाणी देणे, मोकळ्या वाफेंमधून पाणी भरणे, द्राक्ष घडाभोवती कागद गुंडाळणे, प्रसंगी द्राक्ष बागांमध्ये भुसा पेटवून धूर तयार करणे आदी उपाययोजना करत आहेत.

चालू वर्षे द्राक्षबागांसाठी अनुकूल हवामान असल्याने आतापर्यंत द्राक्षबागांची स्थिती उत्तम आहे, मात्र वाढलेली थंडी शेतकऱ्यांना धडकी भरवत आहे. पारा मोठ्या प्रमाणात खाली घसरू नये अशी अपेक्षा शेतकरी वर्गाकडून व्यक्त केली जात आहे. परिसरात मोठ्या प्रमाणात काळे फिल्म, शरद शिडलेस, जम्बो, मामा जम्बो, नानासाहेब पर्पल, काळी सोनाका आदी द्राक्ष लावण्यात आले आहेत.

या द्राक्षबागांची छाटणी लवकर करावी लागत असल्याने या द्राक्षबागाा लवकरच विक्रीसाठी सज्ज होत आहे. आतापर्यंत शेतकऱ्यांनी मोठ्या प्रमाणात द्राक्षबागांवर खर्च केल्याने शेवटच्या टप्प्यात वाढत्या थंडीमुळे मात्र शेतकऱ्यांच्या तोंडचे पाणी पळाले आहे.