अंबासन (जि. नाशिक) : वरचे टेंभे (ता. बागलाण) येथील जुन्ने बोढरी रोडलगत असलेल्या जंगलात एका अनोळखी महिलेचा झाडाला गळफास घेऊन आत्महत्या (Suicide) केलेल्या अवस्थेत मृतदेह आढळून आल्याने एकच खळबळ उडाली आहे. जायखेडा पोलिस घटनास्थळी दाखल होत पंचनामा केला असून, संबंधित महिलेच्या कुटुंबीयांचा शोध घेतला जात आहे. (Woman commits suicide in forest at varche Tembhe nashik news)

पोलिसांकडून मिळालेल्या माहितीनुसार शनिवारी (ता. १८) वरचे टेंभे गावालगतच्या जंगलातील जुन्ने बोढरी रोडलगत एक अनोळखी महिला, वय अंदाजे पंचवीस ते तीस वर्षे वयोगटांतील (नाव, पत्ता समजून आले नाही) असून, निंबाच्या झाडास गळफास घेतलेल्या अवस्थेत मृतदेह आढळून आल्याने परिसरात एकच खळबळ उडाली आहे. जायखेडा पोलिस ठाण्यातील सहाय्यक पोलिस निरीक्षक श्रीकृष्ण पारधी, उपनिरीक्षक तुषार भदाणे व कर्मचाऱ्यांनी तातडीने दखल घेऊन घटनास्थळी धाव घेऊन तपासचक्र सुरू केली. मात्र संबंधित महिलेची ओळख पटली नसल्याने पोलिस कुटुंबीयांचा शोध घेत आहेत.

संबंधित महिलेचा रंग सावळा, डोक्यावर काळे रंगाचे केस, गळ्यात काळा मण्यांची माळ, अंगात फिकट नारंगी रंगाची साडी, काळ्या रंगाचे ब्लाऊज, त्यावर फुलपाखरूंचे डिझाइन, डाव्या हातावर सोनी संतोष गोंदलेले, उजव्या व डाव्या हातात हिरव्या रंगाच्या बांगड्या, उजव्या हातात देवाचा धागा बांधलेला, डाव्या हातात लोखंडी कडे, पायात पैंजण, मृताच्या बाजूस कापडी पिशवी त्यात वापरलेल्या साड्या व लहान मुलाचे जिल्हा परिषद शाळेचा गणवेश, चप्पल आहे. ओळख अद्याप पटत नसल्याने संबंधित महिलेची ओळख पटविण्यासाठी जायखेडा पोलिस ठाणे येथे संपर्क करण्यासाठी आवाहन केले आहे. सहाय्यक पोलिस निरीक्षक श्रीकृष्ण पारधी यांच्या मार्गदर्शनानुसार उपनिरीक्षक तुषार भदाणे पुढील तपास करीत आहेत.