World Disability Day 2023 : अनेकांचे शरीर भक्कम असूनही त्यांच्याकडून कोणतेही सामाजिक अथवा परमार्थिक काम होत नाही. मात्र, दिव्यांग असूनही अखंड धार्मिक कार्याने विद्यार्थी घडवून विठू नामाचा झेंडा जिल्ह्यात एक व्यक्ती रोवत आहे.

जन्मताच दोन्ही पायांनी अधू असतानाही इगतपुरी तालुक्यातील साकूर येथील पंढरीनाथ महाराज सहाणे यांनी वारकरी संप्रदायाची पताका आपल्या परमार्थिक भक्कम कार्याने मजबूत केली आहे. (World Disability Day 2023 disabled Pandharinath Maharaj Sahane give spiritual education to children nashik news)

दिव्यांग असूनही पंढरीनाथ महाराज तालुक्यातील होतकरू मुलांना हरिपाठ, गायन, वादन व पठण कोणत्याही प्रकारचे मानधन, दक्षिणा न घेता शिकवतात. गरीब होतकरू मुलांना कपडे तसेच साहित्य घेण्यासाठी पदरमोड करून वस्तू घेऊन देण्यास त्यांचा पुढाकार असतो. आतापर्यंत त्यांनी सातशेपेक्षा जास्त मुलांना मोफत शिक्षण दिले आहे. त्यांच्या कामाची दखल घेऊन अनेक संस्थांनी त्यांना पुरस्कार देऊन गौरविले आहे.

दिव्यांग असूनही त्याच्यावर मात करत गुरुवर्य नागोराव बहादूरे, निवृत्ती महाराज घोरवडकर यांच्याकडून वारकरी संप्रदायाचे त्यांनी शिक्षण घेतले. त्यानंतर ३० वर्षांपासून ते सेवा देत आहे.

पिंपळगाव घाडगा, निनावी, भरवीर बुद्रुक, टाकेद, धामणगाव, बेलू, पिंपळगाव डुकरा, घोटी खुर्द, आगसखिंड आदी गावांमध्ये ते अखंड हरिनाम सप्ताहाचे आयोजनही करतात.

परमेश्वराचे चिंतन करीत या देहापासून जगाला काहीतरी फायदा व्हावा, अशी इच्छा ते व्यक्त करतात. मुलांवर योग्य संस्कार व्हावे, यासाठी दर वर्षी उन्हाळी सुटीत बालसंस्कार शिबिरही घेतात. त्र्यंबकेश्वर येथे सातत्याने वारी करतात. टाळ-मृदंगाच्या गजरात रोज साकूर परिसर दुमदुमतो. दिव्यांगत्व मन पिळवटून टाकणारे असले तरी मनमोकळे स्वीकारून आत्मिक समाधानासाठी ते मुलांना मोफत अध्यात्मिक शिक्षण देत आहेत.