Matoba Maharaj Yatrotsav : येथील ग्रामस्थांचे दैवत व लाखो भाविकांचे श्रद्धास्थान श्री मतोबा महाराजांचा यात्रोत्सव २५ जानेवारीपासून सुरू होणार आहे.

यात्रोत्सवाच्या पहिल्याच दिवशी केदू बोरगुडे, संतोष ओस्तवाल, डॉ. गंगाधर बोरगुडे, साहेबराव काश्मीरे, प्रकाश रकिबे यांच्या हस्ते सपत्नीक मतोबा महाराजांची मतोबा महाराजांची महापूजा, तर (कै.) डॉ. वसंतराव पवार यांच्या कुटुंबीयांच्या हस्ते रथपूजा होईल, अशी माहिती देवस्थान ट्रस्टने दिली. यात्रोत्सव ९ फेब्रुवारीपर्यंत १५ दिवस अखंड सुरू राहणार आहे. (yatrotsav of Matoba Maharaj from 25 in naitale for 15 days nashik news )

यात्रोत्सवाच्या नियोजनासाठी विश्वस्त मंडळाची बैठक मंदिरात सायंकाळी झाली. श्री मतोबा महाराज देवस्थान ट्रस्टचे अध्यक्ष नामदेव बोरगुडे अध्यक्षस्थानी होते. मंदिर व परिसरातील केर-कचरा व स्वच्छतेबाबत चर्चा झाली.

भक्तनिवासाचे काम ठेकेदाराकडून तातडीने पूर्ण करून घ्यावे. महामार्ग ते मंदिरदरम्यान खांबावर दिवे लावणे, फिरते शौचालय, आरतीसाठी विविध मान्यवरांना निमंत्रित करणे, देणगीदारांचा ध्वनिक्षेपकाद्वारे नामोल्लेख करणे, त्यांची विगतवारी करणे, विश्वस्त मंडळाचा नामफलक लावणे, मंदिर व परिसरात रोषणाई करणे यासह अनेक महत्त्वाच्या विषयांवर चर्चा झाली.

त्याबाबत संबंधित कार्यालयांना तातडीने पत्रव्यवहार करण्याचे ठरविण्यात आले. मंदिराच्या आतील बाजूने संपूर्ण काचेचे काम पूर्ण झाले आहे. ते काम करणाऱ्या कामगारांचा ट्रस्टतर्फे सत्कार करण्यात आला.

बैठकीस उपाध्यक्ष प्रशांत ओस्तवाल, सेक्रेटरी नंदू बोरगुडे, खजिनदार केदू बोरगुडे, सहसेक्रटरी राजेंद्र बोरगुडे, विश्वस्त अण्णासाहेब बोरगुडे, भागवतराव घायाळ, विठ्ठल कोटकर, शांताराम बोरगुडे, माधव जेऊघाले, रामदास भवर, खंडू बोरगुडे, हरी बोरगुडे यांच्यासह गणेश बोरगुडे, कृष्णा कोटकर व स्वयंसेवक उपस्थित होते.

''श्री मतोबा महाराजांचा यात्रोत्सव अखंड १५ दिवस सुरू रहाणार आहे. भाविकांनी शांतता भंग होणार नाही, असे कोणतेही कृत्य करू नये. कमी वेळेत दर्शन होण्यासाठी दर्शन रांगेचे नियोजन सुरू आहे. संपूर्ण नैताळेनगरी भाविकांच्या स्वागतासाठी उत्सुक आहेत. भाविकांनी ग्रामस्थांना, मंदिर व्यावस्थापनास, व्यावसायिकाना योग्य ते सहकार्य करावे.''-नामदेव बोरगुडे, अध्यक्ष, श्री मतोबा महाराज देवस्थान ट्रस्ट