नामपूर - गेल्या चार वर्षांपासून प्राथमिक शिक्षकांच्या बदल्या झालेल्या नाही. यंदाही जून महिना उजाडून शिक्षण/ग्रामविकास विभागाकडून कोणताही आदेश पारित होत नसल्याने शिक्षकांच्या बदल्यांबाबत शिक्षकांमध्ये संभ्रमावस्था होती. परंतु मंगळवारी (ता.७) जारी झालेल्या शासन निर्णयामुळे शिक्षकांची बदल्यांबाबतची प्रतीक्षा संपली आहे. याबाबत प्राथमिक शिक्षक संघटनांच्या पदाधिकाऱ्यांनी समाधान व्यक्त केले आहे.

जिल्हा परिषद शिक्षकांच्या जिल्हांतर्गत/आंतरजिल्हा बदल्यांसाठी ७ एप्रिल २०२१ च्या दोन स्वतंत्र शासन निर्णयान्वये सुधारित धोरण विहित करण्यात आले आहे. सदर धोरणातील तरतुदीनुसार आवश्यक ती कार्यवाही करण्याबाबत जिल्हा परिषदेतील प्राथमिक शिक्षकांच्या जिल्हांतर्गत/आंतरजिल्हा बदल्यांसाठी ऑनलाइन प्रणाली विकसित करण्यात आली असून सन २०२२ मधील बदल्या ऑनलाइन प्रणालीद्वारे करण्यात येणार आहेत. सदर प्रणालीमध्ये प्रत्यक्ष चालणाऱ्या कामकाजाच्या अनुषंगाने बुधवारी (ता.८) सकाळी अकरा ते एक या वेळेत राज्यातील सर्व मुख्य कार्यकारी अधिकारी, जिल्हा परिषद यांचे ऑनलाइन प्रशिक्षण आयोजित करण्यात आले आहे. प्रशिक्षणास उपमुख्य कार्यकारी अधिकारी (सामान्य प्रशासन विभाग) यांनाही उपस्थित राहण्याच्या सूचना देण्यात आल्या आहेत. बदलीस पात्र असलेल्या/विशेष संवर्ग भाग-१ मधील/विशेष संवर्ग भाग-२ मधील शिक्षकांची यादी, निव्वळ रिक्त पदांची यादी, संभाव्य रिक्त पदांची यादी, जिल्ह्यातील अवघड क्षेत्र घोषित करणे आदी बाबींचा यावेळी आढावा घेण्यात येईल.

राज्यातील जिल्हा परिषद शाळांमधील प्राथमिक शिक्षकांच्या बदल्यांसाठी विकसित करण्यात येत असलेल्या मोबाईल ॲपचा मसुदा पूर्ण झाला आहे. हा मसुदा मोबाईल आणि संगणक (डेस्क टॉप) अशा दोन्ही ठिकाणी वापरता येणार आहे. या मसुद्यामुळे प्राथमिक शिक्षकांच्या बदल्या आता या ॲपच्या माध्यमातून ऑनलाइन होणार आहेत. राज्याचे ग्रामविकास मंत्री हसन मुश्रीफ यांनी पुणे जिल्हा परिषदेचे मुख्य कार्यकारी अधिकारी आयुष प्रसाद आणि सातारा जिल्हा परिषदेचे मुख्य कार्यकारी अधिकारी विनय गौडा आदी प्रक्रियेचे कामकाज पाहत आहेत.

विन्सीस सॉफ्टवेअर कंपनीची नेमणूक

जिल्हा परिषदेतील प्राथमिक शिक्षकांच्या जिल्हांतर्गत तसेच आंतरजिल्हा ऑनलाइन बदल्यांसाठी मे. विन्सीस सॉफ्टवेअर कंपनीची नेमणूक करण्यात आली आहे. जिल्हा परिषदेतील प्राथमिक शिक्षकांच्या आंतरजिल्हा बदलीसंदर्भातील १० टक्क्यांपेक्षा जास्त जागा रिक्त असल्यास त्या जिल्हा परिषदांमधून शिक्षकांना आंतरजिल्हा बदलीने बाहेर जाता येत नव्हते. परंतु यंदाच्या बदल्यांमध्ये मात्र अशी तरतूद वगळण्यात आली आहे. त्यामुळे जिल्हा परिषदांमध्ये रिक्त पदाची टक्केवारी १० पेक्षा जास्त असली तरी अशा सर्व जिल्हा परिषदांना, जिल्हा परिषद शिक्षकांच्या सन २०२२ मध्ये होणाऱ्या ऑनलाइन बदली प्रक्रियेमध्ये सहभागी करून घेणे शक्य होणार आहे.