Dhule News : धुळे जिल्ह्यातील दोंडाईचासह साक्री व शिरपूर येथील उपजिल्हा रुग्णालयातील अवैद्यकीय सेवा बंद असल्याने रुग्णांचे मोठ्या प्रमाणात हाल होत आहेत. इतर जिल्ह्यांत सुरू असलेल्या अवैद्यकीय सेवा धुळे जिल्ह्यातही सुरू ठेवण्यात याव्यात, अशी मागणी नागरिक करीत आहेत. (Non medical services in Upazila Hospital closed dhule news)

शासनाच्या निर्णयाप्रमाणे जिल्हा रुग्णालय, उपजिल्हा रुग्णालय व ग्रामीण रुग्णालयात २००५ पासून अवैद्यकीय सेवा सुरू आहेत. नाशिक विभागातील नंदुरबार, जळगाव, नाशिक, अहमदनगर या जिल्ह्यांत अवैद्यकीय सेवा सुरू असून, फक्त धुळे जिल्ह्यातच का बंद आहेत, असा प्रश्न उपस्थित करण्यात येत आहे.

याला फक्त लालफितीचा बेजबाबदारपणा व अधिकाऱ्यांच्या मनमानी कारभारामुळे सुविधा बंद आहेत. राज्य शासनाने २००५ पासून शासकीय रुग्णालयातील ५० व १०० खाटांच्या रुग्णालयात सुरक्षा सेवा, स्वच्छता सेवा, वाहनचालक सेवा, वस्त्र धुलाई, आहार सुविधा, इलेक्ट्रिशियन सेवा, कुशल व अकुशल आदी सेवा २४ तास करार पद्धतीने घेण्यात येतात.

जिल्ह्यातील आरोग्य विभागाच्या अधिकाऱ्यांच्या हलगर्जीमुळे अवैद्यकीय सेवा बंद करून ठेवल्या आहेत. शिरपूर, दोंडाईचा व साक्री उपजिल्हा रुग्णालयात वीजपुरवठा खंडित झाल्यावर रुग्णालयात अंधार होतो.

खासगी वायरमन वेळेवर येत नसल्याने वीजपुरवठा विस्कळित होत असल्याने रुग्णांचे नातेवाईक, वैद्यकीय अधिकारी व कर्मचारी यांच्यात वादविवाद होतात. जिल्ह्यात अवैद्यकीय सेवा खंडित करण्यात आल्या आहेत. आरोग्य विभागाच्या उपसंचालकांनी याकडे लक्ष द्यावे, अशी मागणी नागरिकांनी केली आहे.