शनिमांडळ (जि. नंदुरबार) - शाळांनी बॅंक खात्याचा तपशील व्यवस्थित न दिल्याने तसेच राष्ट्रीयकृत बॅंकेत खाते नसणे, आयएफएससी कोड व्यवस्थित न भरणे आदी कारणांमुळे राज्यातील एक हजार ५१ शाळांना जुलैपासून पोषण आहाराचे अनुदान वितरित करता आलेले नाही. यासाठी सरकारने आता या शाळांना पूर्ततेसाठी रविवारपर्यंत (ता.२०) अंतिम मुदत दिली आहे. 

मुदतीत माहिती न दिल्यास संबंधित शाळांना अनुदान मिळणार नाही. याची जबाबदारी शाळेची व संबंधित अधिकाऱ्यांची राहील, असे शालेय पोषण आहार योजनेचे राज्य समन्वयक दिनकर टेमकर यांनी स्पष्ट केले आहे. शालेय पोषण आहार योजनेंतर्गत इंधन, भाजीपाला अनुदान व शहरी भागातील शाळांचे धान्यादी मालाचे अनुदान एप्रिल २०१८ पासून थेट शाळांच्या खात्यावर जमा करण्यात येत आहे; परंतु राज्यातील एक हजार ५१ शाळांच्या बॅंक खात्यांची माहिती चुकीची असल्यामुळे अनुदान देता आलेले नाही. 

पोषण आहार योजनेचे अनुदान शाळांच्या खात्यावर आरटीजीएस पद्धतीने जमा करण्यासाठी ‘एमडीएस’ पोर्टल होते. तालुका लॉगिनवरून शाळांच्या बॅंक खात्यांची माहिती अद्ययावत करण्यात आली होती. ज्या शाळेच्या बॅंक खात्याची माहिती चुकीची आहे अशांना अद्ययावत करण्याबाबत वारंवार निर्देश देण्यात आले आहे, तरीही अद्याप अनेक शाळांनी दुरुस्ती केलेली नाही. बॅंक खात्याची माहिती अद्ययावत करून संचालनालयास रविवारपर्यंत सादर करावी, त्यानंतरच इंधन, भाजीपाला व धान्याचे अनुदान शाळांच्या बॅंक खात्यावर जमा करण्यात येईल, असे सांगण्यात आले आहे.