Dhule News : ‘सद्‍रक्षणाय खलनिग्रहणाय’ हे पोलिसांचे ब्रीद खरोखर किती समर्पक आहे याचा प्रत्यय येथील मीनाक्षी मुरलीधर मिस्तरी या महिलेला आला.

मध्यरात्री घाबरलेल्या अवस्थेत स्वतःच्या दोन मुलींसोबत पोलिसांच्या मदतीने सुरक्षित स्वतःच्या मामांच्या घरी पोलिस वाहनातून पोचल्यानंतर त्यांना पोलिसांमध्ये प्रत्यक्ष देवाची अनुभूती दिसून आल्याचे त्यांनी सांगितले.(police help woman in night dhule news)

येथील माहेरवाशीण असलेल्या व सध्या साक्रीतच वास्तव्यास असलेल्या मीनाक्षी मुरलीधर मिस्तरी आपल्या दोन मुलींसोबत मंगळवारी कामानिमित्त धुळे येथे गेल्या होत्या. तेथून परतत असताना त्यांना रात्री वेळेत एसटी बस न मिळाल्याने मध्यरात्री उशिरा बाराच्या सुमारास त्या साक्री येथे पोचल्या.

एवढ्या मध्यरात्री काळोखात त्यांना कुठे जावे हे कळत नव्हते. त्यांचे मामा प्रकाश मिस्तरी शहरातील कोकणी कॉलनी येथे राहतात; परंतु त्यांच्या घराचा पत्ता त्यांना नेमका माहीत नव्हता व रात्रीच्या अंधारात रस्तादेखील लक्षात येत नव्हता. अशा भांबावलेल्या व घाबरलेल्या अवस्थेत मीनाक्षी मिस्तरी दोन्ही मुलींसोबत थेट पोलिस ठाण्यात पोचल्या.

या ठिकाणी पोलिस निरीक्षक मोतीराम निकम उपस्थित असताना त्यांना भेटून त्यांच्याकडे मदत मागितली. पोलिस निरीक्षक मोतीराम निकम यांनीदेखील मीनाक्षी मिस्तरी यांना धीर देत त्यांना शांत केले व स्वतःच्या वाहनातून सोबत महिला पोलिस यांना पाठवत त्यांच्या मामांचे घर शोधत त्यांच्या घरापर्यंत सुखरूप पोचविले.

मध्यरात्री पोलिस निरीक्षक मोतीराम निकम यांच्या मदतीने स्वतःच्या मुलींसह सुखरूप घरी पोचलेल्या मीनाक्षी मिस्तरी सकाळी पोलिस ठाण्यात येथे येत पोलिस निरीक्षक मोतीराम निकम यांच्यासह पोलिसांचे आभार व्यक्त केले. या वेळी पोलिसांविषयी कृतज्ञता व्यक्त करताना त्या अतिशय भावुक झाल्या होत्या.

''पोलिस बांधव हे प्रत्येक नागरिकाचे रक्षणकर्ते असल्याने याच भावनेतून रात्री घाबरलेल्या अवस्थेत पोलिसांची मदत घेतली. महिलांच्या बाबतीतील आजूबाजूची परिस्थिती पाहता एकटी महिला सोबत मुली असताना प्रचंड भीती वाटत होती.

मात्र पोलिस निरीक्षक मोतीराम निकम यांच्यासह पोलीस बांधवांच्या आधारामुळे मध्यरात्रीदेखील मी सुखरूप माझ्या मामांच्या घरी पोचले.''-मीनाक्षी मिस्तरी