धुळे : जिल्हा पोलिस शिपाई भरती २०२१ च्या प्रक्रियेची लेखी परीक्षा रविवारी (ता. २) सकाळी पोलिस मुख्यालयाच्या पोलिस कवायत मैदानावर झाली. परीक्षार्थींना ए, बी, सी, डी प्रश्नपत्रिका संच देण्यात आला होता. (Police Recruitment Written Exam Final answer sheet published dhule news)

लेखी परीक्षेतील प्रश्नांसंदर्भात उमेदवारांना सोमवारी (ता. ३) सायंकाळी सहापर्यंत आक्षेप तसेच तक्रारी नोंदविण्याबाबत कळविण्यात आले होते. त्या अनुषंगाने काही उमेदवारांनी लेखी परीक्षेतील प्रश्नांसंदर्भात काही आक्षेप व तक्रारी ई-मेल तसेच अर्जाद्वारे केल्याने त्याचा सांगोपांग विचार करून सुधारित अंतिम उत्तरतालिका पोलिस मुख्यालयाच्या नोटीस बोर्डावर तसेच धुळे जिल्हा पोलिस दलाच्या https://panel.dhulepolice.gov.in/uploads/news/२३०४०३१९५८५४.pdf संकेतस्थळावर प्रसिद्ध करण्यात आली आहे, अशी माहिती मुख्यालयाचे पोलिस उपअधीक्षक संभाजी पाटील यांनी दिली.

दरम्यान, जिल्हा पोलिस दलात दाखल होऊ इच्छिणाऱ्या ५०५ उमेदवारांनी रविवारी लेखी परीक्षा दिली. परीक्षा पारदर्शक पार पडण्यासाठी पोलिस अधीक्षक संजय बारकुंड लक्ष ठेवून होते. परीक्षेदरम्यान अनुचित प्रकार घडू नये यासाठी २० सीसीटीव्ही कॅमेरे लावण्यात आले होते. एकूण ४२ जागांसाठी ही परीक्षा झाली. जिल्ह्याच्या इतिहासात पहिल्यांदाच शारीरिक चाचणीमध्ये पात्र ठरलेल्या तृतीयपंथी उमेदवार चांद तडवी यांनीही लेखी परीक्षा दिली.