मुंबई- काँग्रेसचे नेते राहुल गांधी यांनी एक व्हिडिओ सोशल मीडिया हँडल 'एक्स'वर शेअर केला आहे. राहुल गांधी यांनी व्हिडिओ शेअर करत भविष्यवाणी केली आहे. नरेंद्र मोदी हे पुन्हा पंतप्रधान होणार नाहीत, असं ते म्हणाले आहेत. राहुल यांनी उत्तर महाराष्ट्राच्या नंदुरबारमधील काँग्रेसच्या एका सभेचा व्हिडिओ शेअर केला आहे. (Nandurbar Congress rally)

खरं म्हणजे राहुल गांधी यांनी काँग्रेसच्या नेत्या आणि भगिनी प्रियांका गांधी-वाड्रा यांनी शेअर केलेला व्हिडिओ रिट्विट केला आहे. व्हिडिओच्या कॅप्शनमध्ये राहुल गांधी म्हणालेत की, 'महाराष्ट्र असो की उत्तर प्रदेश, हरियाणा असो की बिहार सगळीकडे इंडिया आघाडीचे तुफान आहे. मी पुन्हा सांगतो. ४ जूननंतर नरेंद्र मोदी पंतप्रधान होणार नाहीत.'

प्रियांका गांधी यांनी व्हिडिओच्या कॅप्शनमध्ये लिहिलंय की, 'महाराष्ट्राच्या नंदुरबारमधील लोकांच्या अशा जोशपूर्ण स्वागताचे मी हृदयापासून आभार मानते. महाराष्ट्राच्या जनतेचा संदेश स्पष्ट आहे. राज्यामध्ये इंडिया आघाडीचे सरकार बनणार आहे.' प्रियांका गांधी या नंदुरबारमध्ये काँग्रेसचे उमेदवार गोवाल पाडवी यांच्या प्रचारासाठी आल्या होत्या.

प्रियांका गांधी यांची राज्यातील ही दुसरी सभा होती. याआधी त्यांनी लातूरमध्ये सभा घेतली आहे. नंदुरबारमधील सभेत गांधी यांनी भाजप आणि पंतप्रधान मोदी यांच्यावर जोरदार हल्लाबोल केला. त्यांनी पंतप्रधान मोदी यांना सल्ला देताना म्हटलं की, 'मोदींनी माझ्या आजी आणि माजी पंतप्रधान इंदिरा गांधी यांच्याकडून काही शिकायला हवं. त्यांनी पाकिस्तानचे दोन तुकडे केले होते.'

देशात निवडणुकीचा पारा एकदम उच्च पातळीवर पोहोचलेला आहे. देशात आतापर्यंत तीन टप्प्यातील मतदान पार पडले आहे. चौथ्या टप्प्यातील मतदान १३ मे रोजी होणार आहे. त्यामुळे आज प्रचाराच्या तोफा थंडावतील. देशात एकूण ७ टप्प्यामध्ये मतदान होत आहे. ४ जून रोजी निकाल लागेल. देशाच्या जनतेने कोणाच्या बाजूने कौल दिलाय हे या दिवशी स्पष्ट होईल.