नाशिक ः अवर्षणप्रवण क्षेत्रात मोडणाऱ्या भागावर परतीच्या पावसाने मेहरबानी केली आहे. धो-धो कोसळलेल्या पावसाने नुकसानीला सामोरे जावे असले, तरीही टंचाईतून काहीसा दिलासा मिळाला आहे. जिल्ह्यात उद्यापासून (ता. 25) पाच दिवस मध्यम ते जोरदार पावसाचा अंदाज हवामान विभागाने वर्तवण्यात आला आहे. 
हवामान विभागाच्या अंदाजानुसार उद्या 24, गुरुवारी (ता. 26) 53, शुक्रवारी (ता. 27) 44, तर शनिवारी (ता. 28) 13 व रविवारी (ता. 29) 27 मिलीमीटर पावसाची शक्‍यता आहे. या कालावधीत कमाल तापमान 30 ते 33 व किमान तापमान 22 ते 23 अंश सेल्सिअसपर्यंत, तर वाऱ्याचा वेग तासाला 3 ते 6 किलोमीटर राहण्याची शक्‍यता या विभागाची आहे. हवामानातील बदलामुळे धुळीचे साम्राज्य वाढलेले असताना आरोग्याचे प्रश्‍न तयार झाले होते. पावसाने वातावरणाला कलाटणी मिळाल्याने या प्रश्‍नांवर काही अंशी उपाय होईल. आज सायंकाळी शहर आणि परिसरात पावसाने जोरदार हजेरी लावली. 
आज सकाळी आठला संपलेल्या चोवीस तासात मालेगावमध्ये 13, नांदगावमध्ये 5, चांदवडमध्ये 33, कळवणमध्ये 87, बागलाणमध्ये 37, सुरगाण्यात 1.2, देवळ्यात 22, निफाडमध्ये 3.2 मिलीमीटर पावसाची नोंद झाली आहे. गेल्यावर्षी 1 जून ते 24 सप्टेंबर या कालावधीत 86.5 टक्के पाऊस जिल्ह्यात झाला होता. यंदा आतापर्यंत 148.27 टक्के पाऊस झाला आहे. 

जिल्ह्यातील आतापर्यंतचा पाऊस 
(आकडे पावसाच्या टक्केवारीचे) 
तालुका         पाऊस            तालुका            पाऊस 
नाशिक       187.46          कळवण           91.85 
इगतपुरी     156.54          बागलाण         151.53 
दिंडोरी        159.79           सुरगाणा        156.83 
पेठ            148.22           देवळा             78.75 
त्र्यंबकेश्‍वर   174.07          निफाड           110.79 
मालेगाव     132.49          सिन्नर           142.02 
नांदगाव      113.60          येवला            151.19 
चांदवड       120.78         (देवळ्याला आणखी पावसाची गरज)