कापडणे (जि. धुळे) : धुळे तालुक्यातील शेतकरी शेतीतून आर्थिक दर्जा उंचावण्यासाठी विविध प्रयोग करू लागले आहेत. स्निग्ध वर्गीय तीळ (Oily sesame seeds) हे खास पावसाळी पीक आहे. तीळ उन्हाळ्यात घेण्याचा प्रयोग शेतकरी करू लागले आहेत. मात्र बहुतांश बागायतदार शेतकऱ्यांची तिळीची उबवण झाली नाही.

मात्र येथील युवा शेतकरी राजा पाटील यांनी ठिबक सिंचनने घेतलेली तीळ शंभर टक्के उबवली आणि आता चांगलीच बहरली आहे. उन्हाळ्यात बहरलेली तीळ बघण्यासाठी बरेचसे शेतकरी येत आहेत. नुकतीच कृषी मंडळ अधिकारी मनीषा पाटील, कृषी सहाय्यक संजय देवरे व कृषी पर्यवेक्षक सतीष कोतकर, भगवान पाटील, कैलास पाटील, दीपक काटे, विजय पाटील आदींनी भेट दिली. त्यांनी तिळीच्या बहरलेल्या पिकाबद्दल समाधान व्यक्त केले. शेतकरी राजा पाटील यांनी घेतलेल्या काळजीविषयी माहिती जाणून घेतली. तसेच मार्गदर्शनही केले.