Dhule News : राज्यातील सर्वच शाळांना उन्हाळी सुटी सुरू आहे. विद्यार्थ्यांसह शिक्षकही सुटीचा आनंद मनमुराद लुटत आहेत. बरेचसे शिक्षक पर्यटन अनुभवत आहेत. पण मी आणि माझी शाळा म्हणत, काही शिक्षक सुटीतही शाळेत रमले आहेत. (Sharad Choudhary Principal of zp School No 2 planted flowers dhule news)

येथील जिल्हा परिषद शाळा क्रमांक दोनचे मुख्याध्यापक शरद चौधरी यांनी फुलवलेली फुलझाडे. अन त्यांना ऐन उन्हाळ्यात जगविण्यासाठी ते धडपडत आहेत. ते सुटीतही पाणी घालण्यासाठी वेळ देत आहेत.

येथील जिल्हा परिषद शाळा क्रमांक एक एकशे साठ आणि शाळा क्रमांक दोनची पन्नाशीकडे वाटचाल सुरु आहे. आजही या शाळांची गुणवत्ता वाखाणण्यासारखी आहे. पूर्वीपेक्षा अधिक गुणवत्ता कशी वाढेल, याकडे मुख्याध्यापक आणि शिक्षकांचे प्रयत्न सुरु असतात.

दोन्ही शाळांमध्ये गुणवत्तेची निकोप स्पर्धा पाहायला मिळते. शाळेतील शिक्षकांनी वर्गाच्या भिंती बोलक्या केल्या आहेत. शाळा डिजिटल आहे. या शाळांचे मुख्य कार्यकारी अधिकारी एस. बुवनेश्वरी यांनी कौतुक केले आहे.

हेही वाचा : Credit Card फसवणूक....काय घ्याल काळजी?

येथील मुख्याध्यापक आणि शिक्षक सुट्या असूनही शाळा आणि विद्यार्थ्यांच्या संपर्कात आहेत. मोबाईलच्या माध्यमातून सुटीतील अभ्यास करून घेत आहेत.

तर मुख्याध्यापक शाळेचा परिसर सुंदर करण्यासाठी प्रयत्नशील आहेत. फुलविलेले फुलझाडे आणि रोपट्यांना पाणी घालण्यासाठी नियमित येत आहेत. सुटीतही राबणाऱ्या शिक्षकांचे ग्रामस्थांकडून कौतुक होत आहे.

"शाळेचा परिसर बोलका आणि फुलझाडांनी नटलेला हवा. मुले आणि फुले प्रफुल्लित असली म्हणजे शिक्षकांचेही मन रमते. ग्रामस्थांच्या सहकार्याने शाळेत बाग फुलवायची आहे." -शरद चौधरी, मुख्याध्यापक