नाशिक : सायने बुद्रुक (ता. मालेगाव) शिवारातील गट क्रमांक 275 व 376 येथील खानपट्टा तपासणीसाठी गेलेल्या जिल्हा खनिकर्म अधिकारी आनंद पाटील, सायने बुद्रुक येथील तलाठी नामदेव पवार यांच्यासमवेत असलेल्या महसूल विभागाच्या पथकावर अवैधरीत्या दगड वाहतूक करणाऱ्या दहा ते बारा ट्रॅक्‍टरचालकांनी दगडफेक केली. गुरुवारी (ता. 23) दुपारी पावणेचारच्या सुमारास हा प्रकार घडला. या घटनेचा महसूल कर्मचाऱ्यांनी निषेध केला. 

असा घडला प्रकार...

श्री. पाटील व सहकारी खानपट्टा तपासणीसाठी आले होते. दोन खानपट्ट्यांतील तपासणी करताना या पट्ट्यात सहा ट्रॅक्‍टर उभे होते. त्याजवळ दहा ते बारा अनोळखी उभे होते. तपासणी करताना तलाठी पवार यांच्यासह मंडल अधिकारी, काही तलाठीदेखील होते. संबंधितांनी ट्रॅक्‍टरचालक, मालकांना खनिज परवान्याबाबत विचारणा केली. संबंधितांनी नाव, पत्ता सांगण्यास नकार देत ट्रॅक्‍टर पळवून नेले. अन्य दहा ते बारा संशयितांनी महसूल अधिकारी, कर्मचाऱ्यांवर दगडफेक केली. 

हेही वाचा >  माझा काय दोष..मी का "नकोशी"? लुकलुकत्या डोळ्याने 'तिने' जणू विचारले...

तालुका पोलिस ठाण्यात तक्रार दाखल 

याबाबत माहिती समजताच पोलिस निरीक्षक नरेंद्र भदाणे, उपनिरीक्षक जयसिंग राजपूत व सहकारी घटनास्थळी पोहचले. त्यांनी पंचनामा करत परिसरात संशयितांचा शोध घेतला. गुरुवारी रात्री पावणेदहाच्या सुमारास तलाठी पवार यांनी तालुका पोलिस ठाण्यात याबाबत तक्रार दिली. तालुका पोलिस ठाण्यात दगडफेक करणाऱ्या अनोळखींविरुद्ध शासकीय कामात अडथळा व दंगलीचा गुन्हा दाखल करण्यात आला. 

हेही वाचा>इगतपुरीच्या हातसडीच्या तांदळाची मुंबईत चलती!