सटाणा  : ताहाराबाद (ता.बागलाण) येथील आयएसओ मानांकित ज्ञानदेवी सावित्रीबाई फुले प्राथमिक व माध्यमिक विद्यालयात चालू शैक्षणिक वर्षासाठी आंतरराष्ट्रीय संस्था यूनेस्को क्लब असोसिएशनची स्थापना करण्यात आली. या क्लब अंतर्गत विद्यालयातील सहा ते चौदा वर्षे वयोगटातील विद्यार्थ्यांना आंतरराष्ट्रीय पातळीवर जपान येथे प्रतिनिधित्व करण्याची संधी मिळणार आहे.

विद्यालयात यूनेस्को क्लब असोसिएशनची स्थापना

यूनेस्को स्कूल क्लब ही आंतरराष्ट्रीय शैक्षणिक, सामाजिक व सांस्कृतिक संस्था यूनेस्कोची चळवळ आहे. या अंतर्गत जगभरातील शाळांना जोडून तेथील विद्यार्थ्यांना आंतरराष्ट्रीय स्तरावर आपले गुणदर्शन करण्यासाठी संधी उपलब्ध करून देते. या उद्देशाने मानांकित ज्ञानदेवी सावित्रीबाई फुले प्राथमिक व माध्यमिक विद्यालयात यूनेस्को क्लब असोसिएशनची स्थापना करण्यात आली. युनेस्को क्लब ऑफ इंडियातर्फे संस्थेचे संस्थापक अध्यक्ष डॉ.दौलतराव गांगुर्डे व संस्थेच्या सचिव अंजलीताई गांगुर्डे यांना प्रमाणपत्र देऊन गौरविण्यात आले. या क्लब अंतर्गत शाळेतील विद्यार्थ्यांनी चित्रकला व निबंध स्पर्धेत सहभाग घेतला. स्पर्धेतील विजयी विद्यार्थ्यांपैकी विजेत्या विद्यार्थ्यांना जपान येथे प्रतिनिधित्व करण्याची संधी मिळणार आहे. यावेळी प्राथमिक विभागाचे मुख्याध्यापक प्रफुल्ल जाधव, माध्यमिक विभागाचे मुख्याध्यापक हर्षल पाटील आदींसह सर्व शिक्षक व विद्यार्थी उपस्थित होते. विद्यालयाच्या यशाबद्दल सर्व स्तरातून अभिनंदन होत आहे. 

युनेस्को क्लब अंतर्गत जपान येथे प्रतिनिधित्व करणारे विद्यार्थी 

अनन्या जाधव (पहिली), यशश्री पगारे, वैष्णवी गवळी, शिवानी भामरे ( इयत्ता चौथी), मयुर साळवे, निकिता देसले, भूमिका कोठावदे, श्रेयस खैरनार, देवेश पवार, दिक्षा खैरनार (सर्व इयत्ता तिसरी).