निमगूळ (जि.धुळे) : दोंडाईचा शहरातील सरस्वती कॉलनीत चोरट्यांनी भरदिवसा चक्क कारमध्ये गाय चढवत असताना युवकांनी पाहिले अन् पाठलागही केला मात्र चोरटे पसार झाले. ही घटना सीसीटीव्हीमध्ये कैद झाली असून, दोंडाईचा पोलिस अज्ञात वाहन व चोरट्यांचा शोध घेत आहेत. (thieves stole cows from car dhule crime news)

बुधवारी (ता. २९) दिवसा दोंडाईचा शहरातील सरस्वती कॉलनीत ओपन स्पेससमोरील घरातील सीसीटीव्ही कॅमेऱ्यात एक कार थांबलेली व त्या परिसरात असलेल्या गुरे फिरताना दिसतात.

त्यातील लाल रंगाच्या गायीला चोरट्याने मागून ढकलून गाडीत टाकले, तेवढ्यात घरातील लोकांनी पाहिले असता चोरट्यांनी कार पळविली, काही नागरिकांनी पाठलाग केला परंतु चोरटे पसार झाले.

हेही वाचा : जीएसटीसाठी नोंदणी केलीच नाही तर?

दोंडाईचा पोलिसांना घटनेची माहिती मिळताच पोलिस निरीक्षक श्रीराम पवार, पोलिस उपनिरीक्षक सचिन गायकवाड, उपनिरीक्षक शरद लेंडे, उपनिरीक्षक दिनेश मोरे, पोलिस शिपाई प्रेमराज पाटील, दुसाने उशिरापर्यंत चौकशी करत होते. दरम्यान, शहरातील नागरिकांनी आपले पाळीव गुरे मोकाट फिरू देऊ नयेत, तसेच काळजी घ्यावी, असे आवाहन पोलिस निरीक्षक श्रीराम पवार यांनी केले.