पिंपळनेर : येथील सटाणा रोड वरील एका लॉन्समध्ये सोमवारी (ता.६) लग्नात आलेला आहेर सोन्याच्या पुतळ्यासह एक लाख दहा हजार दोनशे वीस रुपये किमतीचा आहेर अल्पवयीन बालकाने चोरून नेल्याची घटना पिंपळनेरला घडली आहे. ही घटना सीसीटीव्ही कॅमेरात कैद झाली असून, याप्रकरणी पिंपळनेर पोलिसात गुन्हा दाखल झाला आहे.

सटाणा रोड वरील एका लॉन्समध्ये दहिवेल येथील राजेंद्र दहिवेलकर यांच्या मुलीचा विवाह होता. त्या विवाहात धुळे येथील वासुदेव कोठावदे हे आलेल्या नातेवाइकांकडून आहेर स्वीकारण्यासाठी बसले होते. लग्न आटोपल्यानंतर रात्री साडेनऊ वाजेच्या सुमारास त्यांनी गोळा झालेली ९२ हजार ७०० रुपयांची रोख रक्कम व आहेर म्हणून मिळालेले चार नग सोन्याच्या पुतळ्या अंदाजे किंमत सतरा हजार पाचशे रुपये असा एकूण एक लाख दहा हजार दोनशे रुपये किमतीचा ऐवज बॅगेत ठेवली होता. ती बॅग त्यांनी उजव्या बाजूला हाताशी ठेवली होती. ते नातेवाईकांशी बोलत असताना एका अज्ञात तेरा वर्षीय बालकाने ती बॅग चोरून नेली ही घटना लॉन्स मधील सीसीटीव्हीच्या कॅमेरात कैद झाली असून, त्या बालकाने कोणाच्या तरी सांगण्यावरून ही बॅक चोरुन नेल्याचा संशय आहे. वासुदेव कोठावदे यांच्या फिर्याद दिली. पुढील तपास पोलिस उपनिरीक्षक भाईदास माळचे करीत आहेत.