Dhule Crime News : कत्तलीसाठी जनावरांची वाहतूक करणारी दोन वाहने नरडाणा (ता. शिंदखेडा) पोलिसांनी पकडली. या वाहनांत जनावरांची निर्दयतेने वाहतूक करण्यात येत होती. वाहनात चार जनावरे मृत आढळली.

पोलिसांनी ३३ जनावरे व वाहनांसह एकूण ११ लाख ५९ हजार किमतीचा मुद्देमाल जप्त केला. या प्रकरणी नरडाणा पोलिस ठाण्यात गुन्हा दाखल झाला. (Traffic of animals for slaughter was stopped by police dhule crime news)

नरडाणा ते बेटावददरम्यान दोन मालवाहतूक करणाऱ्या वाहनांमधून कत्तलीसाठी जनावरांची वाहतूक होत असल्याची माहिती नरडाणा पोलिस ठाण्याचे सहाय्यक निरीक्षक सचिन बेंद्रे यांना मिळाली. याआधारे पथक तयार करून सापळा रचला. यात नरडाण्याहून बेटावदकडे जाणारे दोन ट्रक (एमएच ४१, एजी ८७१०, एमएच ४१, एयू ४३३८) दिसले. पोलिसांनी वाहने थांबविण्याचा प्रयत्न केला.

मात्र, न थांबता बेटावदच्या दिशेने भरधाव वाहने गेली. पोलिसांनी पाठलाग केला असता बेटावदजवळ दोन्ही वाहने थांबवून चालक व सहचालक पसार झाले. पोलिसांनी दोन्ही वाहने ताब्यात घेतली. या वाहनांमध्ये एकूण ३७ जनावरे निर्दयपणे कोंबून त्यांची कत्तलीसाठी वाहतूक होत असल्याचे आढळले.

या प्रकरणी वाहनचालक व मालकांविरुद्ध गुन्हा दाखल झाला. ही कारवाई जिल्हा पोलिस अधीक्षक श्रीकांत धिवरे, अपर पोलिस अधीक्षक किशोर काळे, पोलिस उपअधीक्षक सचिन हिरे, सहाय्यक पोलिस निरीक्षक सचिन बेंद्रे यांच्या मार्गदर्शनाखाली उपनिरीक्षक रामनाथ दिवे, राकेश शिरसाट, विजय पाटील, भगरे, दरबारसिंग गिरासे, विजय माळी यांनी केली.