जळगाव ः महापालिकेने दैंनंदिन स्वच्छतेचा मक्ता नाशिक येथील वॉटर ग्रेस कंपनीला दिला आहे. परंतू गेल्या दोन महिन्यापासून कर्मचाऱ्यांचे वेतन मिळाले नसल्याने मंगळवारी घंटागाड्यावरील कर्मचाऱ्यांनी काम बंद आंदोलन केले होते. आज सकाळी पून्हा वेतन मिळावे यासाठी एक कर्मचाऱ्याने थेट अंगावार रॉकेल ओतून आत्मदहन करण्याचा प्रयत्न केला. 

महापालिकेने शहरातील दैनंदिन कचरा संकलन व स्वच्छतेचा वॉटर ग्रेस कंपनीला पाच वर्षासाठी 75 कोटीचा मक्ता दिला आहे. तीन महिने होऊन देखील शहरातील स्वच्छता व्यवस्थित होत नसल्याने स्थायी, महासभा तसेच यावेळी नागरिकांच्या तक्रारी वाढल्याने कंपनीच्या कामावर संशय व्यक्त करण्यात आला होता. त्यात कर्मचाऱ्यांना पगार दिला जात नसल्याचे आरोप होत होते. त्यात मंगळवारी कर्मचाऱ्यांना दोन महिन्यापासून पगार मिळत नसल्याने घंटागाड्यावरील कर्मचाऱ्यांनी कामबंद आंदोलन पुकारून होते. 
त्यात आज सकाळी शिवाजी उद्यानातील घंटागाड्यांच्या डेपोवर कर्मचाऱ्यांनी पून्हा संप सुरू केला. यावेळी 
कंपनीच्या प्रतिनीधींनी संप करणाऱ्यांना काही जणांना काढून टाकण्याचा सांगितले. त्यामुळे यावेळी शाब्दीक 
चकमक उडाल्याने यात राजू परदेशी या कर्मचाऱ्याने अंगावर रॉकेल ओतून आत्मदहन करण्याचा प्रयत्न केला. 

कर्मचाऱ्यांनी संप घेतला मागे 
सकाळी घडलेल्या घटनेनंतर कर्मचाऱ्यांनी संप मागे घेण्याचा निर्णय घेत, शहरातील कचरा संकलन करण्याचे कामाला आज सुरवात केली. कर्मचाऱ्यांनी मंगळवारी कामबंद आंदोलन केल्याने शहरात अनेक ठिकाणी कचरा उघड्यावर टाकण्यात आला होता. त्यामुळे आज सकाळी कर्मचाऱ्यांनी आंदोलन मागे घेत सर्व 85 घंटागाड्या शहरात कचरा संकलनासाठी गेल्या.