रावेर - प्रेयसींचे अनैतिक संबंध असल्याच्या संशयावरून केऱ्हाळे खुर्द (ता. रावेर) येथील खेडी शिवारात दोन महिलांचा तीक्ष्ण हत्याराने मंगळवारी खून करण्यात आला. याप्रकरणी पोलिसांनी अवघ्या आठ तासांतच संशयित दोघांना गावातून अटक केली आहे. संशयितांनी खून केल्याची कबुली दिल्याची माहिती उपविभागीय अधिकारी नरेंद्र पिंगळे व पोलिस निरीक्षक रामदास वाकोडे यांनी पत्रकार परिषदेत दिली.

केऱ्हाळे खुर्द येथील शालूबाई गौतम तायडे (वय ५७), नसीमा रुबाब तडवी (वय ४६) या सोमवारी दुपारी साडेबाराच्या सुमारास गुरांना चारा आणण्यासाठी खेडी शेती शिवारात गेल्या होत्या. या महिला घरी न आल्याने  त्यांच्या नातेवाइकांनी रावेर पोलिस ठाण्यात हरविल्याची नोंद केली होती. दरम्यान, शेती शिवारात या महिलांचे मृतदेह आढळले होते. 

पोलिस अधीक्षक डॉ. पंजाबराव उगले, अप्पर अधीक्षक भाग्यश्री नवटके यांचे मार्गदर्शनाखाली उपविभागीय पोलिस अधिकारी नरेंद्र पिंगळे, पोलिस निरीक्षक रामदास वाकोडे, जळगाव स्थानिक गुन्हे शाखेचे पोलिस निरीक्षक बापू रोहोम, कर्मचारी यांच्यासह रावेर पोलिस ठाण्याचे उप निरीक्षक सुनील कदम, मनोज वाघमारे, जितेंद्र पाटील, अजय खंडेराव, विजय जावरे, नीलेश चौधरी, भागवत धांडे, गफूर शेख, मंदार पाटील आदींनी तपासाची चक्रे फिरवून प्रथम केऱ्हाळे खुर्द (ता. रावेर) येथील कैलास गुणा गाढे (वय ५७) यास ताब्यात घेतले व पोलिसी खाक्या दाखवताच त्याने कबुली दिली. सोबत लक्ष्मण किसन निकम (वय ६०) यास रात्री ताब्यात घेतले.

लक्ष्मण निकम याचे शालू तायडे हिच्याशी व कैलास गाढे याचे नसीमा तडवी हिच्याशी अनैतिक संबंध होते. दोघा महिलांचे बाहेरही अनैतिक संबंध असल्याच्या संशयावरून दोघा संशयितांनी संगनमत करून नसीमा तडवी हिच्या गळ्यावर चाकूने वार केला, तर शालू तायडे हीचा पंपाच्या दोरीने गळा आवळला. यानंतर चाकूने वार करून ठार मारले.

याप्रकरणी दुहेरी खुनाचा गुन्हा दाखल करण्यात आला असल्याची माहिती उपविभागीय पोलिस अधिकारी नरेंद्र पिंगळे व पोलिस निरीक्षक रामदास वाकोडे यांनी दिली. या दोघा संशयितांना न्यायालयात हजर केले असता, २५ नोव्हेंबर पर्यंत पोलिस कोठडी देण्यात आली आहे.